УВЕР ЙОГЫН

Лудшылан да лудшо дене пырля

Эртыше кугарнян Звенигово районысо Красногорский библиотеке 90 ияш лӱмгечыжым палемден.

«90 ий лудшо дене пырля да лудшылан» лӱман пайремыш Марий Элын тӱвыра, савыктыш да калык паша шотышто министржын алмаштышыже Г.Ширяева, Звенигово муниципальный образованийым вуйлатыше Н.Лабутина, Звенигово район администрацийым вуйлатышын алмаштышыже О.Михайлова, тиде администрацийынак культур пӧлкажым вуйлатыше А.Коптелова, «Марий книга издательстве» савыктыш пӧртын директоржо Ю.Соловьев, «Ончыко» журналын редакторжо Б.Шамиев, Марий самырык театрын актёржо-влак И.Актуганов ден А.Кожевников, районысо профсоюз комитетын председательже С.Гаврилова, Свято-Никольский черкын протоиерейже А.Никитин, Ташнур тӱвыра да каныме пӧртын директоржо А.Дружинин, регионысо газет, библиотеке пашаеҥ, лудшо-шамыч да молат миеныт. Нуно книгагудо пашаеҥ-влакым чапле лӱмгече дене саламленыт, шуко поро шомакым ойленыт да калыкым книгам лудаш кумылаҥдыме пашаште у деч у кӱкшытыш шуаш тыланеныт.

Пайремым В.Шумилов, Н.Павлова, О.Пшеничная, «Мурэҥер» ансамбль, Красногорский музыкальный школын, «Теремок» йочасадын воспитанникышт сылне художественный номерлашт дене сӧрастареныт.

Мероприятий библиотекылан 90 ий теммылан веле огыл пӧлеклалтын, тудо тыгак калыкын тӱткышыжым книгам, газет ден журналым лудаш, иквереш погынен, кугезе йӱлам шарналташ да чыла тидым самырык тукымлан ончыкташ, каласкалаш кӱлмӧ йодышлан ойыраш виктаралтын.  

М.ИВАНОВА

Опубликовать в Одноклассники

Добавить комментарий