Марий кугыжаныш университетыште марий йылме корпусым ыштыме паша умбакыже шуйна. Кызыт фольклор практике материал-влакым шымлена да радамлена.
Поян материал кокла гыч иктыжым савыкташ ямдыленна. Семык муро-влакым Марий кугыжаныш университетын студенткыже Татьяна Шабердина Пелагия Трофимовна Рослякова (1927 ийыште шочын) деч 1996 ийыште возен налын. Ӱшанен кодына, Шернур кундемыште, Кугу Мушко ялыште, кызытат нине-муро-влак йоҥгалтыт. Тек Семык пайремым моло кундемыштат муро сöрастара.
- Ой, Семыкем, Семыкем,
Лопка Семыкем толдалын.
Лопка Семык толмо дене
Мотор унам толалын.
- Паша годым пашам ыштена,
Йыдал важык кайымешке.
Семык шуэш, мурен колтена,
Яндар йӱкна йоммешке.
- Ужар кож вуйышкыжо
Ончаламак ала-мо.
Тиде Семык пайремжылан
Муралтемак ала-мо.
- Йӱаш, йӱаш, йӱаш лиеш,
Йӱын йӧралташ ок лий.
Йӱын руштын, мален колтен,
Семыкым мондаш ок лий.
- Окна ончыл пызлыгичкым
Тый шотледа кочылан.
Семык пайремлан мурен каем да,
Тый шотледа йоргалан.
- Вуйышто улшо пеледышан шовычем
Шондыкышто кийыкташ налын омыл.
Тидат Семык пайремнаже
Кугешнен шинчаш толын огыл.
Л.АБУКАЕВА
С.Пехметован фотожо.
Шернурысо Пеледыш пайремыште Семык йӱлам ончыктымаш.
