25 май – Йомшо йоча-влакын тӱнямбал кечышт. Тидын вашеш «ЛизаАлерт» шке кумылын кычалше да утарыше отряд 25-30 майыште «Yolka» ужалыше рӱдерыште ончерым эртарен.
Отряд Россий мучко лу ий пашам ышта. Ты жапыште йоча йоммо нерген 22 тӱжем йодмаш пурен. Кодшо ийын 6581 ньогам кычалыныт, 5730-ым илышым муыныт. Тений 3232 икшыве йоммо нерген увертареныт, 2821 – илыше. Ты увер дене «ЛизаАлерт» ВКонтакте тӱшкаштыже палдарен. «Ме кычалмаште сай йӧнлам палена, келшыше оборудованийнат уло. Волонтёрна-влак кажне татыште тарванен каяш ямде улыт. Полшаш ушнаш кумылда уло гын, мыланна серышым возен колтыза», – палемдыме тушто.
Марий Элыште йомшо-влак чот дене «ЛизаАлерт» отрядын пресс-службо еҥже Наталья Федорова палдарыш: «Кодшо ий 15 май гыч тенийсе 15 май марте сӱрет тыгай: чылаже 177 йодмаш пурен
. Тышеч 126-ым илышым, 19-ым колышым муынна. 11-ым але кычалына. Йоча-влакым ончалаш гын, 33-ын йомыныт, 32-ым илышым муынна, иктым – илыш дене чеверласышым».
Ача-ава-влак, кугыеҥ-шамыч, шекланыза лишылда-влакым. Тек тӱняштына йоммо нерген уверлан вер огеш лий. А кычалаш, утараш полшышо-влаклан моткоч кугу тау!
О.МОШКИНА
