25 апрельыште республикысе сборный пункт гыч икымше тӱшка призывник-шамычым службым эртыме верышкышт торжественно ужатышт. Ты кечын 34 рвезе салтак радамыш шогале. Кок командым кок верыш колтышт. Ик тӱшка Нижний Новгородыш логалеш гын, весе – Москва воктеке.
Нуным саламлаш, поро тыланымаш дене ужаташ генерал-майор, Марий Эл правительстве председательын алмаштышыже С.Воронцов, генерал-майор С.Самсонов, Марий Элын военный комиссарже С.Сидоркин толыныт.
Йӱла почеш молгунамсе семынак призывник-влаклан кӱлеш экипировкым пуышт, ача-ава дене вашлияш, кутыраш жапым ойырышт.
Марий Эл военный комиссариатын призывлан ямдылалтме да тудым эртарыме отделжын начальникше С.Григорьев поро мутым каласыш. Торжественный ужашыште призывник-влаклан сай службым тыланышт, Александр ача юмыйӱла почеш ужатыш.
Пытартыш жапыште Отечествым аралаш, порысым шукташ рвезе-влак кумылын каят, патриотизм шӱлышат утларак палдырна. Ожнат тыгак лийын, таче кечынат: армийыш миен толшо рвезе илышым умылышо, ончыланже задачым шынден моштышо пӧръеҥ лиеш.
Тек нунын службышт сайын эрта, вуй ӱмбалне канде кава лиеш, чевер кече шыргыжеш, тыныс озалана.
Кумданрак — «Марий Эл» газетын
2018 ий 27 апрельыште лекше номерыштыже лудын кертыда.
Е.Эшкинина.
Д.Речкинын фотожо
