2 апрельыште Козьмодемьянскыште «Игнатьев лудмаш: курыкмарий-влак историй да тӱвыра кышкарыште» XIХ региональный шанче-практике конференций лиеш.
Тудым Тӱвыра, печать да калык-влакын пашашт шотышто министерстве, МарНИИЯЛИ, Марий кугыжаныш университет, Республикысе калык творчестве рӱдер, Курыкмарий район администраций иквереш эртарат. Тений конференций Российыште театрын идалыкшылан пӧлеклалтеш. Тушко лингвист, литературовед, фольклорист, историк, археолог, этнограф, этномузыковед, искусствовед, театровед, культуролог, тоштер пашаеҥ, вузласе студент, аспирант-влакым ушнаш ӱжыт. Тӱҥ шотышто курыкмарий йылмым вияҥдыме да арален кодымо дене кылдалтше йодыш-влакым каҥашаш тӱҥалыт. Курыкмарий сылнымут, фольклор, марий драматургий, театр искусство, тоштер, архив, библиотек паша, художественный промысел дене кылдалтше йодыш-влакымат тарваташ лиеш.
Мероприятийыш ушнаш шонышо-влак йодмашым 11 март марте МарНИИЯЛИ-ш Надежда Александровна Федосеевалан fedna74@yandex.ru электрон почтышкыжо колтен кертыт. Чыла йодышым 8 (8362) 45-25-92 телефон дене рашемдаш лиеш.
С.Носова.
