Сеҥымаш кечылан Параньга район Яҥгетсола ялысе «Ший шымаш» ветеран клубын пӧръеҥже-влак родо, пошкудышт-шамычлан сай пӧлекым ыштеныт.
Лачшымак, тӱвыра пӧрт ончылно «Сар годым…» фотозоным келыштареныт. А тудыжо партизан отрядын шогымо вержым ушештарен. Импровизироватлыме аланыште кож укш гыч шалашым нӧлтеныт, икмыняр куэм шогалтеныт, пундышым вераҥденыт. Туштак пу гыч пӱчкеден лукмо автоматым, гранатым ужаш лийын. Сар жапыш пӧртылтышӧ Лайдемыр лӱман салтакын манекенжат шоген. Тудлан военный формым чиктеныт. 9 май кечын саде Лайдемырет кече мучко тушто автомат дене «шинчен» да сар жапысе муро-влакым «колыштын».
Манекенжым уста кидмастар Виталий Владимирович Морозов ыштен. Тудо пу гыч тӱрлӧ арверым пӱчкеда. Сӱрет пашаже-влак тӱвыра пӧрт пырдыжымат сӧрастарат. Пӱчкеден лукмо автоматше-влак ончерлаштат ончыкталтыт. Уста кидше дене ыштыме ече, издер дене Яҥгетсолаште илыше-шамычат куржталыт да мунчалтат. Суртпечыштыжат шкенжын ыштыш-кучышыжо ятыр. Илышым йӧратыше кумылан ветеранна художественный самодеятельностьыштат участвоватла. Сеҥымаш кечым палемдымашке пайрем шӱлышым ешараш полшымыжлан кугу таум каласена да пеҥгыде тазалыкым тыланена
Э.ЗАХАРОВА
Снимкыште: В.Морозов «Сар годым…» проектын авторжо.
Авторын фотожо
