КУЛЬТУР ДА ИСКУССТВО

Кӱсле – республикнан брендше

5 июньышто Э.Сапаев лӱмеш опер да балет театрыште «Орган да кӱсле» концерт эртыш. Амалжат кугу – лач ты кечын марий калыкын тошто семӱзгарже – кӱсле – республикын брендшылан шотлалтеш манмым документ дене пеҥгыдемдышт.

Концерт тӱҥалме деч ончыч сценыш  Марий Эл правительстве председательын икымше алмаштышыже Михаил Васютин, тӱвыра, печать да калык-влакын пашашт шотышто министр Константин Иванов лектыч.

— Ӱмаште идалык мучаште Федераций Советыште мемнан республикын презентацийже эртыш. Ик эн волгыдо да шарнымашеш кодшыжо марий кӱслезе-влакын мастарлыкым ончыктымышт лийын. Лач тунам марий кӱслем республикнан брендышкыже савырышаш нерген мутланенна. А таче мылам Национальный президент искусство школлан свидетельствым кучыкташ ӱшаненыт. Кӱсле – Марий республикнан официальнын пеҥгыдемдыме национальный поянлыкше, — кугешнен палемдыш Михаил Зиновьевич да сертификатым президент искусство школ вуйлатыше Николай Смирновлан кучыктыш.

— Ты семӱзгарым вияҥдымаште, чынжымак, Николай Алексеевичын надырже кугу. Кӱслем уэмдымаште, тудым тачысе жаплан келыштарымаште чот тырша, —  каласыш Константин Анатольевич да Н.Смирновлан эше ик сертификатым кучыктыш. Тиде документ семӱзгар мастарын фортепианом тӧрлыше да йӱк шотышто келыштарыше специалист улмыжым пеҥгыдемда. 

Тиддеч вара залыш погынышо-влак, а туштыжо утларакше кеҥежымсе усталык мастерскойыш чумыргышо талантан икшыве да туныктышыжо-влак лийыныт, чапле концертым ончышна. Концертыште руш, йот да нунын дене пырля марий композитор-влакын  произведенийышт орган (А.Воронина, А.Ушков) да кӱсле («Чинчывий» ансамбль), тыгак флейте (РСФСР-ын сулло артистше В.Шапкин) почеш йоҥгышт.

А.БАЙКОВА

М.Скобелевын фотожо

Опубликовать в Одноклассники

Добавить комментарий