Марий Элыште пожар надзор кугыжаныш службын эн сай инспекторжылан Йошкар-Оласе пӧлкан кугурак инспекторжо Станислав Ямбашевым шотлымо.
Тудо профессиональный мастарлык конкурсышто сеҥышыш лектын. Ты службышто ныл ий веле пашам ышта гынат, ойыртемалт шуктен. Российысе МЧС ГПС академий деч вара республикыш толын. Ончыч пожарный частьыште ыштен, вара тудым пожар надзор службыш кусареныт. Тӱҥ шотышто документаций дене пашам ышташыже логалеш, профилактике мероприятийым, тергымашым эртара, посна еҥ-влак деч пурышо йодмаш пошеч верыш лектеда.
— Сайын шарнем, кузе икымше гана пожар лийме верыш лектынам. Тул озаланыме верыште колышо еҥын капшым ончен лекташ кӱлын, чонлан моткоч каньысырын чучын. Пожарын амалжым рашемдыме годым ойгыш логалше еҥ-влак дене мутланаш логалеш. А тидым ышташ куштылгыжак огыл. Эшежым туллан ылыжаш амалым ыштыше южо еҥже шке титакшым шылташ тырша, сандене ты пашаште психологат лиийман, — каласкала Станислав. Но утларакшым тудлан профилактике пашам эртараш келша. Тиде поснак кӱлешан манын палемда тудо.
С.НОСОВА
