21-23 сентябрьыште Йошкар-Олаште эртыше «Роза ветров» турист да краеведений фестиваль Тӱнямбал туризм кечылан пӧлеклалтын.
Икмыше кечын тушко 30 участник ушнен. Нунылан фото-квест эртен. Нуно вуйушыштым пудыратен, тӱрлӧ йодышлан вашештеныт да оҥай маршрут почеш ола мучко эртеныт.
Фестивальын кокымшо кечыже Сеҥымаш паркыште пайрем сынан лийын. Тушко 5 гыч 18 ияш марте Йошкар-Ола, Шернур, Килемар, Кужэҥер районла гыч ӱдыр-рвезе-влак ушненыт. Йошкар-Оласе 27-ше №-ан школ пеленысе «Вездеходы» группат ты мероприятийыш икымше гана ушнен. Тудын участникше-влакат моло дене пырля сусыргышо еҥлан икымше полышым пуаш, курчакым ышташ, пуыш сӱретлаш туныктымо мастер-классыште лийыныт, калык модыш дене модыныт, кундемысе памятник, кушкыл, янлык, кайык-влакым палымыштым ончыктеныт, тиддеч посна ончылгоч ямдылыме карт почеш лабиринтым эртеныт, велосипед дене кудалыштыныт, кандыра дене ошкылыныт да моло таҥасымаштат чолгалыкым ончыктеныт.
— Фестивальыш ушнымылан моткоч куаненна. Ме чыланат вич пунктышто лийынна, сандене тынарак жетоным погенна, — палемдыш «Вездеходы» группын участникше Андрей Пушкин. — Тений кӱкшӧ пырдыжыш кӱзен огынал, но вес ийлан тренерна Галина Фёдоровна Сидыганова мемнам тидланат туныктен шукта шонена.
Фестиваль мучашлалтме кечын спорт ориентирований дене «Шӧртньӧ шыже» таҥасымаш эртен. Тушко Йошкар-Ола да республикысе районла гыч веле огыл, Чебоксар ден Новочебоксарск олала гычат участник-влак погыненыт.
Мероприятийым иктешлымеке, кажне участниклан сертификатым, а сай результатым ончыктышо-шамычлан грамотым кучыктеныт.
А.Байкова.
Авторын фотожо.
