СПОРТ

Кӧ писынрак куча, рожым шӱта..?

Кодшо кечылаште У Торъял райынысо Элеволко ял воктенысе пӱяште спортивный кол кучымаш дене таҥасымаш эртен. Тудо 34-ше пожарно-утарыше частьын диспетчерже Алексей Пироговым шарнымылан пӧлеклалтын.

Ты гана мастарлыкышт ден писылыкыштым Пожар ваштареш кучедалме федеральный службын Марий Элысе 4-ше отрядшын еҥже-влак тергеныт. Чылаже 7 команде чумырген.

Россий МЧС-ын тистыжым ӱмашсе сеҥыше-влакын нӧлталмышт деч вара А.Пироговым ик минут шып шоген шарналтеныт. Шке жапыштыже тудо тыгай таҥасымашын организаторжо да тӱҥ судьяже лийын.

Инструктаж деч вара колызо-шамыч эҥырыштым вашкерак кучен шинчыныт да чӱҥгымым вучаш тӱҥалыныт. Но участник-шамычлан ты шотышто веле огыл, эше ийыште рожым ыштыме да канатым шупшмаште  писылыкым ончыкташ кӱлын.

Команде-влак коклаште икымше верым оза-шамыч —  45-ше пожарно-утарыше частьын коллективше – налыныт. Кокымшо верыш Шернур гыч 29-ше пожарно-утарыше частьын командыже лектын. Кумшыш – Йошкар-Ола гыч 2-шо пожарно-утарыше частьын пашаеҥже-шамыч.

Личный зачетышто адакат 45-ше частьынак участникше — Николай Соловьев – сеҥен. Кокымшо верыш ты частьынак караул начальникше Александр Соколов, кумшо верыш 29-ше частьын пожарный автомобиль водительже Эдуард Милютин лектыныт.

Тиддеч посна кажне шкешотан номинацийыште ойыртемалтше-шамычым, мутлан, колым эн ончыч, эн кугум кучышым, канатым шупшмаште сеҥышым, ийыште рожым эн писын ыштышым, палемденыт.

Таҥасымаш деч вара чыланат тулышто шолтымо кечывал кочкышым пырля ыштеныт.

 

Л.Камалетдинова.

Опубликовать в Одноклассники

Добавить комментарий