УВЕР ЙОГЫН

Кыл лиеш — чыла сай лиеш

15-17 майыште Озаҥыште «Российысе регионлаште этнос-влак кокласе кылым саемдыме шотышто калыкле-тӱвыра автономийын рольжо да верже» йодыш дене регион-влак кокласе конференций эртен.

Тушко Марий Эл гыч делегаций миен. Тудым Марий Элын тӱвыра, печать да калык-влакын пашашт шотышто министр Михаил Васютин вуйлатен. Делегацийын составыштыже Российысе марий-влакын калыкле-тӱвыра автономийыштым вуйлатыше Л.Яковлева, организацийын исполкомжым вуйлатыше, Марий тӱвыра  рӱдер директор Н.Пушкина да Республикысе Татар тӱвыра рӱдер вуйлатыше И.Гайсин лийыныт. Озаҥ оласе Марий  НКА-н председательже Л.Мусихинат тушко ушнен.

Михаил Васютин Российысе шуко калык илыман кундемлаште вашкылым пеҥгыдемдыме шотышто нормативно-правовой актын проектышкыже темлымашым ямдылыше пашаче группын заседанийыштыже выступатлен. Тудо мемнан республикыште калык кокласе кылым пеҥгыдемдаш полшышо мероприятий-влакым эртараш кӱлмым палемден коден.

С.Носова.

Опубликовать в Одноклассники

Добавить комментарий