«Мариэнерго» филиал Йошкар-Оласе технологий колледжын электроэнергетике факультетыштыже икымше курсышто тунемше-влакым онлай-урокыш чумырен.
Филиалын энергийым аралымаш да энергопайдалыкым кугемдымаш пӧлкажын начальникше Татьяна Деникина тунемше-влаклан энергосистемым вияҥдыме нерген каласкален. Ончыкылык энергетик-влаклан отрасльын могай корным эртымыжым да эртышашыжым радамлын почын ончыктымо.
Тиде ынде тунемше-влак дене икымше онлайн-вашлиймаш огыл, но нуно тугак шукырак пален налаш кумылан улыт. Ончыкылык дене кылдалтше йодыш поснак шуко лийын: электровий кузе шапашлалтеш, отрасльым вияҥдыме кужу жаплык проект мом сӧра?..
Тунемше-влак «Мариэнергош» мийынешт, но эпидемий чараклан кӧра тӱҥ электросеть компанийыште экскурсийым да занятийым эртараш кызытеш ок лий. Но энергетик-влак ӱшандареныт: тыгай йӧн лекмеке, шонымышт садыгак шукталтеш. Вет тыгай мероприятий энергетик профессийлан веле огыл кумылаҥда, тыгак ончыкыжо филиалыш пашам ышташ толаш тарата. А энергетик-влак нунылан пашаште шке верыштым муаш полшат.
Ю.ИСАКОВ
