11 июньышто Марий Элым вуйлатыше Александр Евстифеев Йошкар-Оласе Пролетарский уремыште чоҥен шуктыдымо пӧртын йӱлымыж шотышто оперативный совещанийым эртарен.
Правительстве председательын алмаштышыже Степан Воронцовын радамлымыж почеш, Россий МЧС-ын Марий Элысе диспетчер службышкыжо пожар тӱҥалме нерген 13 шагатлан увертареныт. Тул ныл пачашан оралтын туврашышкыже веле огыл пижын, мардежлан кӧра воктенысе кок пӧртын кок пачерышкыжат куснен. Чыла службо шке пашажым оперативно шуктен, сандене пожарым жапыштыже йӧртен кертме. Палемдыме верыште 23 еҥ ден 9 единице технике пашам ыштен. Пожарыште колышо але сусыргышо еҥ лийын огыл.
А.Евстифеев ЧП деч вара илыме фондым тергаш да азапыш логалше-шамычлан полшаш кӱштен.
Регионым вуйлатышын кӱштымыж почеш, 19 шагат гыч илыме пӧрт-влакын кудывечыштышт оперативный штаб пашам ыштен, тушто мэрийын, коммунальный службо-влакын еҥышт лийыныт.
«Тул пижме амалым рашемдыме деч вара титакан еҥын эҥгекым пӧртылтымыж нерген мутланаш тӱҥалына», – палемден А.Евстифеев.
Азапыш логалше-шамычлан Йошкар-Оласе «Сосновая роща» интернат-пӧртыш икмыняр жаплан илаш куснаш темлыме. Калык илышым вияҥдыме шотышто министр Марина Островскаян мутшо почеш, тушто 32 еҥлан вер уло.
Регионым вуйлатыше мэрий ден министерстве-влаклан калыкым интернат-пӧрт марте наҥгаен кодаш, а вара мӧҥгышкышт кондаш транспортым ойыраш, ола администрацийлан азапыш логалше-шамычлан материальный полышым ойырымо йодышым лончылаш, илыме пӧртын подъездшым лийме семын писынрак шотыш кондымо пашам организоватлыме шотышто докладым ышташ кӱштен.
Азапыш логалше граждан-влакын илыш условийышт кучемын тӱткышыштыжӧ лийшаш, оперативный совещанийым мучашлыме деч ончыч палемден А.Евстифеев.
Марий Эл Республикым вуйлатышын организаций
да аналитике виктемжын уверже негызеш
М.ИВАНОВА ямдылен
