Тений 8 январьыште Йошкар-Олаште илыше Татьяна Александровна Румянцевалан 101 ий темын.
Курым утла илыше пагалыме ӱдырамашым саламлаш родо-тукымжо веле огыл погынен, тудын деке тыгак Марий Элын социальный вияҥмаш министржын алмаштышыже Эдуард Загрутдинов, Йошкар-Ола администрацийым вуйлатышын алмаштышыже Людмила Новоселова да Йошкар-Оласе калыкым социально обслуживатлыме комплексный рӱдерын директоржо Марина Кожевникова миеныт.
Эдуард Ирикович пайрем озалан Марий Элым вуйлатыше Александр Евстифеев деч саламлымашым, пеледыш аршашым да шарнымашан пӧлекым кучыктен, Людмила Андреевна – ола администраций деч пӧлекым да пеледышым. Уна-шамыч Татьяна Александровналан тазалыкым, чулымлыкым да чолгалыкым тыланеныт. А пайрем оза нунын тӱткышыштлан уло кумылын тауштен.
Вачӱмбакыже тынар ийым пыштен гынат, Татьяна Александровна ончычсо гаяк весела да поро кумылан, тазалык начареммылан веле коклан вуйым шиеш. Но вич йочаже, кандаш уныкаже, уныкаже-влакын кандаш шочшышт да ик уныкажын уныкаже тудым ик татланат тӱткыш деч посна огыт кодо.
Татьяна Румянцева Киров область Санчурск район Александровский почиҥгаште кресаньык ешеш шочын. Ныл классым тунем пытарен. Ӱмыржӧ мучко тӱшка озанлык пашаште тыршен: ончыч – «Йошкар шӱдыр» колхозышто, вара, сулен налме канышыш лекмешкыже, – «Санчурский» совхозышто.
1940 ий 15 февральыште шкеж деч шым ийлан кугурак Александр Михайлович Румянцевлан марлан лектын. Но еш пиал кужун шуйнен огыл: пелашыже Кугу Отечественный сарыш каен… да пленыш логалын. Изи ӱдыр йочашт дене кодшо Татьяна, марийже сар гыч илыше пӧртылжӧ манын, йӱдшӧ-кечыже гаяк тургыжланен. Да Юмо фронтовик ватын сӧрвалымыжым колын!
1946 ийыште Татьяна Александровна ден Александр Михайлович Румянцевмыт Тула областьыш каеныт. Еш оза шахтыште тыршен, озавате ныл ӱдырышт ден ик эргыштым воспитатлен, нуным сай айдемым ончен-куштен.
Илыш корныштыжо шуко неле-йӧсым чытен гынат, Татьяна Александровна –тугаяк поро, чоным почын, куанен мутланыше ӱдырамаш.
М.ИВАНОВА
