Марий Элын калык артистше Галина Ковалева тыгай лӱман онлайн-фестивальыш ушнен да «Эн сай актёр» номинацийыште сеҥышыш лектын.
Актрисе «Котёнок на снегу» спектакль гыч Ушан корак (Вещая ворона) дене пырля изирак мутланымашым модын ончыктен.
Фестивальын трансляцийже Кострома курчак театрын YouTube-каналыштыже эртен. Конкурс кум кече эртен. Тиде жапыште кумылан еҥ-влак кум номинацийыште («Театр, который хотелось бы посетить», «Лучший актер» да «Лучшая кукла») сеҥышым йӱклымаш почеш ойыраш полшеныт.
Икымше номинацийыште Саратов область гыч «Лель» театр, кумшышто Саранск гыч Йоча-влаклан «Крошка» театр да кино рӱдер ойыртемалтыныт.
Фестиваль 19 гыч 22 май марте эртен. Тушко Моско, Нижний Новгород, Влпадимир, Магнитогорск, Орёл, Санкт-Петербург да моло ола гыч кугыжаныш да частный курчак театр-влак ушненыт.
А.БАЙКОВА
