СПОРТ Чолгалык

Куржталме дене «шокшо тургым»

14-16 майыште Йошкар-Олаште куштылго атлетике дене Марий Элын чемпионатше ден первенствыже эртен. Спортсмен-влак 24 комплект медальым  сеҥен налыныт. 

Ты гана куд куштылго атлет «шӧртняҥын». Ӱдырамаш-влак коклаште Анастасия Антонова, Анна Семёнова, Ольга Прядкина, Евгения Валова, а пӧръеҥ-шамыч коклаште Владимир Охотников ден Евгений Петухов ойыртемалтыныт.

Эн сай результатым 200, 400, 800 метрыште ончыктеныт. Тыште сеҥыше ден призёр-влак 1-ше спорт разряд нормативым шуктеныт. Моткоч тале таҥасымаш 400 метрыште Никита Чирков ден Егор Кузнецов коклаште финишыште лийын. Никита соперникшым 0,01 секундлан ончылтен.

Команде-влак коклаште икымше верым олимпийский резерв училищын, кокымшо «Политехник», кумшо верыш МарГУ-н командышт лектыныт. Чаманен каласыман, район-влак коклаште лач Медведево район гыч гына спортсмен-влак лийыныт.

Куштылго атлетике дене федерацийын вуйлатышыже Алексей Гребневын палемдымыж почеш, республикыште ойыртемалтше спортсмен-влак ПФО-н чемпионатше ден первенствыштыже вийыштым тергат. Таҥасымаш 4-5 июньышто Чебоксарыште лиеш. Туштак элнан 20 ияш марте спортсменже-шамыч коклаште V спартакиадын 2-шо этапше эрта. А 23-27 июньышто Чуваш Республикыште Российын чемпионатше лиеш.

У рекорд

Марий Элыште шочын-кушшо спортсмен-влак ӧрдыж кундемлаштат вийыштым тергат, сай результатым ончыктат. Мутлан, 16 майыште землякна Алина Прокопьева Санкт-Петербург воктене эртыше Царскосельский марафонышто таҥасен, 2-шо верым налын.

– Мый тушто пелемарафоным куржынам. Кумыл сай лийын. Финишыш толын шумо деч ончыч Чуваший гыч ик ўдыр 7 секундлан ончылтыш. Тидыже мыланем вучыдымо ыле, – ойла Алина. – Тыгодым шкан личный рекорд лийын. Палемдыме трассым 1 шагатат, 12 минут да 20 секундышто эртенам, Озаҥ олаште эртыше Универсиадыште кучалтше рекордем саемденам.

А.Прокопьевам саламлена да вес стартыште сеҥымашым тыланена. Черетан таҥасымаш 30 майыште Смоленскыште лиеш. Тушто Алина пелемарафоным куржаш тӱҥалеш.

Е.ЭШКИНИНА.

Опубликовать в Одноклассники

Добавить комментарий