СОЦИАЛ ИЛЫШ

Купан чодырам сеҥен марий мландыш поезд вашкен

Йошкар-Оласе кӱртньыгорно вокзалын вучымо залже мӱкшомартала гӱжла. 

Чал ӱпан, но эше пеҥгыде капкылан илалше еҥ-влак икте-весым ужын саламлалтыт, ваш-ваш вӱчкат. Таче нуным, кӱртньыгорно пашан ветеранже-влакым, тышке Марий мландыш икымше поезд толмылан 90 ий темме лӱмгечым палемдаш пагален ӱжыныт. Толде кертат мо? Вет нунын кокла гыч шукынжо моло пашам ужынат огытыл, уло еш дене кӱртньыгорнышто тыршеныт, тиде куштылго огыл сомыллан уло илышыштым пуэныт.

— Чылаже — 46 ий, тышеч 20 ийжым корно мастерлан ыштенам, — каласыш Куяр поселко гыч 86 ияш Николай Михайлов.

А пеленжак шинчыше 83 ияш Иван Артамонов кӱртньыгорно пашаште 50 ий наре тыршен.

— Ме пырля пашам ыштенна, икте-весылан эре полшенна, — мутшым шуя Николай Евсеевич. — Тунам неле лийын. Пашаеҥ-влакат ситен огытыл. А рельсым ме кид дене обработатленна. Кызыт тыге пашам огыт ыште…

— Ой, а вет тунам те шукыжым ӱдырамаш-влак дене пашам ыштенда, шарнеда, Евсеич? Софроныч, туге? Шужашат, кылмашат шуко логалын. Тендан гай корно мастерже тетла уке, коктын гына кодында, — мутланымашкына пеленна шогышо ӱдырамаш ушныш. Клавдия Миндероват  зданийым олмыкымо шотышто мастерлан 39 ий ыштен. Тудат кӱртньыгорно пашаеҥ-влакын ешыштышт кушкын, садлан тиде профессийымак ойырен.

Мутланымашнам духовой оркестрын пайрем семже кӱрльӧ. Кугу лӱмгече дене саламлаш Горький кӱртньыгорно вуйлатышын алмаштышыже, поез-влакын корныштым лӱдыкшыдымылык шотышто эскерыше тӱҥ ревизор Ш.Асанов, Марий Эл промышленность да корно озанлык транспорт министрын сомылжым жаплан шуктышо Д.Волков, кӱртньыгорно  шотышто территориальный управлений вуйлатышын алмаштышыже А.Черемнов, Озаҥ регионысо ветеран-влак советын председательже Н.Курбатин толыныт.  Кӱртньыгорно вокзалын пырдыжыштыже мемориал оҥам торжественно почмеке, пайрем вучымо залыш кусныш. Паша ветеран-влакым саламлыме годым эртыше жапым шарналтыде огеш лий, вет Зеленый Дол-Йошкар-Ола (тунам Краснококшайск) линийым почаш куштылгыжак лийын огыл. А тыгай пунчалжым МАО-н 2-шо областной партийный конференцийыштыже 1921 ий 15-18 августышто лукмо. 1923 ийыште Элнет эҥер марте трассым ыштеныт, кӱвар-шамычлан свайым кыреныт, шпалым ямдыленыт, рельсым шупшыктеныт. Корно вашке ышталтеш манын шоненыт, но умбакыже чоҥаш шийвундо ситыдымылан кӧра чылажат чыгынен шогалын. Паша 1925 ийыште гына уэш ылыжын. Чылажат чын да сайын ышталтше манын, кугу сомылым Моско гыч инженер В.Кованько вуйлатен, а Куяр станций гыч И.Пашин мастер лийын, Е.Михайлов — бригадир.

 Кумданрак — «Марий Эл» газетын
2017 ий 21 октябрьыште лекше номерыштыже лудын кертыда.

Г.Кожевникова.
М.Скобелевын фотожо.

Опубликовать в Одноклассники

Добавить комментарий