Звенигово районышто «Российысе парк-влакын маршышт» акцийыш чолган ушненыт.
Тудо «Марий чодра» национальный паркын, районысо администрацийын да йоча творчестве рӱдерын полшымышт дене лийын. Акций кышкарыште йоча-влак шочмо кундемыштым эрыктеныт, пушеҥгым шынденыт, пӱртусым аралаш кумылаҥдыше конкурс ден викториным, йодыштмашым, концертым эртареныт.
А 24 апрельыште «Парк-влакын маршышт» акцийжак эртен. Тушко районысо 12 образовательный учреждений ушнен. Ончыч нуно Красногорский посёлко мучко эртеныт, вара школ воктене митингыш чумыргеныт. Мутым налше-влак шочмо кундемын пӱртӱсшым, янлык-влакым арален кодаш кӱлмо нерген ойленыт. А вара экологий шӱлышан агитбригаде-влакын конкурсышт тӱҥалын. Икымше верыш Красногорскийысе 2-шо №-ан школ лектын.
С.Носова
