ФИНН-УГОР ТӰНЯ

«Кундемда лишыл лийын шуктен»

Удмурт кугыжаныш университетын студентше Андрей КРАСИЛЬНИКОВ дене ме «Финн-угор калык-влакын поянлыкышт»  форумышто палыме лийынна. Рвезе филологий пӧлкаште тунемеш. Шкеже Ярский район Казаково ялыште шочын-кушкын.

– Андрей, тый Марий Элыш икымше гана толынат?

Туге, икымше гана. Марий кундем мылам моткоч келшен, поснак калыкше поро кумылан, унам ончен моштышо. Марий Эл мотор пӱртӱсшӧ дене кумылым савыра.

– А форумышто могай шанче паша дене палдаренат?

Мый йолташем-влак дене  удмурт модыш да одо куштымаш дене мастер-классым ончыктенна.  Тыгак гармонь дене шоктенам. Тыгак тиде мероприятий у йолташ-влакым муаш, у кылым чоҥаш полшен.

– Гармонь дене шоктет гын, тугеже ансамбльышкат коштат?

Ынде икмыняр ий «Чипчирган» ансамбльыште улам. Чипчирган – тиде удмурт калыкын семӱзгарже. Тудо флейтыла коеш. А шкеже мый баян дене шокташ тунемынам, но варажым чонем гармонь велке шупшылын. Тиде семӱзгар чонемлан лишылрак лийын. Гармонь дене калык мурым, эстраде семымат шокташ келша. Сымыктышлан изинек шӱман улам. Мурашат йӧратем.

– Капкылетым ужын, спорт дене пеҥгыде кылым кучымет коеш…

Шке жапыштыже рукопашный бой дене заниматленам. Кызыт тиде сомылым шеҥгекырак шӱкалаш логалын. Жап ок сите. Кугу верым тунеммаш налеш.

– Пытартыш жапыште самырык тукым шочмо йылмыж дене мутланаш вожылеш. Тендан дене тидын шотышто кузерак?

Республикнан рӱдолаштыже, Ижевскыште, удмуртла кутырышо ӱдыр-рвезе-влакым шагалрак ужаш лиеш. Тидыже чонем туржеш. Но сӱрет тугайжак уда огыл.  Кундемыштына удмурт самырык тукымлан йылме дене кылдалтше тӱрлӧ форумым эртарат. Тыгак икмыняр ий  ончыч «Удмурт йылмым тунемына» дискым луктыныт. Тидыже  могай-гынат полышым пуа.  Мый шкеже шочмо йылме дене мутланаш нигуштат ом вожыл, садлан весе удмуртла кутыраш аптырана гын, шылтален налам.

– Тыйын шонымаште, удмурт ден марий коклаште могай ойыртем ден икгайлык уло?

Икмыняр ий ончыч тӱшкагудышто мый марий рвезе дене иленам. Сандене калыкдан йылмыж дене мыняр-гынат палыме лияш йӧн лийын. Икмыняр шомашке йӧршын удмуртла йоҥга. Тыгак южо шомакыште йӱкшӧ гына изиш ойыртемалтеш. Марий рвезе дене илыме годым марла изиш кутыраш тунем шуынам. Тыгак ме родо-тукым калык улына, садлан тендан тӱвыра, йӱла, илыш ойыртемда дене лишкырак палыме лияш моткоч оҥай ыле. Тидым ышташ мыланем форум йӧным пуэн. А икымше гана марий куштымашым шке шинчам дене Петрозаводскышто лиймем годым ужынам. Тушко «Цармис» ансамбль миен ыле. Тунамак Марий Элыш  миен толаш кумылем чот ылыжын. Шонымем шукталтын. Ынде кундемда мылам моткоч лишыл лийын.

– Тугеже ме тыйым эше ик гана унала ӱжына.

Тау!

Лидия ШАБДАРОВА.

М.Скобелевын фотожо

 

Опубликовать в Одноклассники

Добавить комментарий