Шыже. Кече шуенрак онча. Уремыште йӱр… Йӱштӧ толмо дене шуко еҥын кумылжо волен, очыни. Депрессий манме деч утлаш манын, психолог Лариса Соловьёва лу каҥашым ямдылен:
- Шукырак каныза. Суткаште шым шагат деч шагал огыл малыза.
- Йолташ-влак дене жапым эртарыза. Нунын пелен веселарак.
- Телевизор да компьютер ончылно шагалрак шинчыза. Эрдене да малаш вочмо деч ончыч ик шагат наре жапым гаджет деч посна эртарен ончыза.
- Творчестве нерген ида мондо. Сӱретлыза, фотосӱретым ыштыза. Почеламутым сераш келшыше жап.
- Шонымашдам дневникыш возыза.
- Пайдале привычкым илышыш пуртыза. Мутлан, кечыште пел шагат наре жапым спортлан ойырыза. Кечеш кум стакан ару вӱдым йӱаш тыршыза.
- У хоббим кычалза. Пидын, тӱрлен огыда мошто гын – тунемза. Шун гыч иктаж атым ненчен ончыза.
- Шокшо чай, кофе але какао йӱштыштӧ тендам ырыктен веле огыл, кумылдамат нӧлтен кертыт.
- Шӱлык вашке эрта, вет тудо жаплан гына. Сай кече лиймеке, те мом ышташ тӱҥалыда? Тидын нерген шоналтыза.
- Шкендам йӧратыза!