УВЕР ЙОГЫН

Кумшо вер — кугешнаш амал

Марий Элысе самырык пожарный-влакын «Искорка» дружинышт Моско кундем гыч кумшо вер дене пӧртылын.

Моско областьыште элысе самырык-влакын пожарный дружиныштын слетышт эртен. Марий Элын чапшым тушто Марий Турек районысо Нартас школын командыже арален. Тиде таҥасымашым Россий МЧС, Образований да науко министерствын полшымышт дене Всероссийский добровольный пожарный обществе эртарен.

Вич кече жапыште слётын участникше-влак кандаш конкурсышто таҥасеныт: «Спорт универсиаде», «Визитный картычке», «Муро да строй смотр», «Пожарный эстафете», «Пожарный кругосветке», «CTIF программе почеш таҥасымаш», пырдыж газет, агитбригаде конкурс-влак. А яра жапыште тӱрлӧ тренинг, тренировко эртеныт. Кажне кече эрденымсе зарядке гыч тӱҥалын да танцпол дене мучашлалтын.

Кажне гаяк конкурсышто ӱдыр-рвезе-влаклан  пожарныйын пашаж дене кылдалтше шинчымашым, мастарлыкым, спортсмен улмым, шонен, сӱретлен моштымым ончыкташ кӱлын. Нелырак йыжыҥыштыже нуным кугурак ийготан наставник-влак вашлийыныт.  

 Чыла тергымашым эн сайын Алтай крайысе Барнаул ола гыч «Факел» дружине эртен. Кокымшо верыш Моско областьын «Альтернативе» дружиныже лектын. А Марий Элын ӱдыр-рвезыже-влак кумшо лийыныт. Нуным Йошкар-Оласе кӱртньыгорно вокзалыште Россий МЧС-н Марий Элысе Тӱҥ управленийыжын да ВДПО-н республикысе пӧлкажын еҥже-влак вашлийыныт да сеҥымаш дене саламленыт.

 С.Носова.

Опубликовать в Одноклассники

Добавить комментарий