Шукерте огыл Марий Эл Республик вуйлатыше А.Евстифеев шке указше дене Александр Макаровым Киров областьыште Марий Элын полномочный представительжылан шогалтен. Тидын нерген Мер Каҥашын шошымсо сессийже годым увертарышт. Молан лач тудлан тыгай ӱшаным ыштыме?
Кодшо ийын Киров областьыште Мер Каҥашын верыш лектын эртарыме заседанийже лийын. Лач тушто тыгай темлымашым ыштеныт. Александр Иванович Киров областысе марий-влакын ик эн чолга енже манашат лиеш. 49 ийыш тошкалын. Лебяжский район Изиморко ялыште ешыж дене ила. Мер Каҥашын Киров кундем деч енже кидпаша сатум ыштен ужалыше предприниматель. Пелашыжат моткоч чолга, марийжылан амалкалче семын веле огыл, мер пашаштат полша. Макаровын мер пашаш ушнымыжлан ынде лу ий утлат лиеш. Тусо марий-влакым илыш дене тӧр ошкылаш кумылаҥдаш тырша.
«Паша шуко, чылаланат чон йӱла», — палемда шкеже. Кажне ийын февральыште, Киров областысе марий районла гыч чолга еҥ-влакым чумырен, паша планым ыштат. Активыш чынжымак ура чонан еҥ-влакым ушен кертыныт. Пытартыш кугу пашашт — 19 апрельыште Советский районышто Александр Федрович Конаковлан посна пӧлемым почыныт. Тидыже тусо марий-влакым веле огыл ӧрыктарен. Молан манаш гын Марий кундемыште чапым налше, «Пеледыш пайремлан» негызым ыштыше туныктышо, драматург, мер пашаеҥ шке жапыштыже Кукаркысе педучилищыште тунемын. Архив материалым чумырымеке, пеш сай пӧлемым ыштен кертыныт.
Александр Иванович шке примерже денат тусо марий-влакым ылыжтен шога. Тудын шочмо да илыме ялже Лебяжский районышто лачшымак ик марий ял гына. Эшежым моло дене таҥастарымаште, тушто икшыве чот кушкын толеш. Изиморкышто илыше марий-влак воктенысе илемласе калыкымат шке койышышт, йӱлашт дене ӧрыктарат. Тушто фермер озанлыкат, потребительский кооперативат улыт, у сурт-влак эре нӧлталтыт. А у пӧртым нӧлташ манын, тошто марий йӱлаланат — вӱмалан — эҥертат. Ялысе кооперативым Москваште Россий кӱкшытан выставкыштат ончыктеныт да эсогыл кум гана ик эн сай радамыш лектыныт. «Кузе ялем, калыкем дене ом кугешне!» — ойла Александр. — Мемнан калык пеш пашаче, икте-весылан полшаш ямде, кеч-могай сай у тӱҥалтышлан кумылан. Арня жапыште пӧртымат леведыш йымаке пуртен кертына».
Александр марла пеш сайын мутлана. Вет тудын илыме ялжат марий кундем деч куд километр наре веле тораштырак верланен. Мер Каҥашын еҥже семын Марий Элышкат чӱчкыдын толын кая, марий мер илышым эше кузе ворандараш манын шона.
С.Носова
М.Скобелевын фотожо
