Апрель мучаште Кужэҥер посёлкысо паркыште Марий Талешке кечылан пӧлеклалтше митингым эртареныт. Тушто «Всемарийский Совет-Мер Каҥаш» регион кокласе мер движенийын верысе вуйлатышыже М.Григорьев, «Боевое братство» ветеран-влакын всероссийский организацийын Марий отделенийжын верысе вуйлатышыже С.Хлыстик лийыныт, уна-шамычым саламленыт.
Организатор-влак пайремым Совет да Россий армийлан 100 ий темме кышкарыште юж десант войскаште служитлыше-влаклан пӧлекленыт. Кужэҥер районышто шочын-кушшо юж десант войскан воинже-влакым шарналтеныт. Вет тиде войскаште службым эртыше-шамыч элыштына, республикыште, шочмо верлаштышт, кугыжаныш Вооруженный Вийын историйыштыже поро кышам коденыт да кодат.
Мероприятийыште герой-землякышт орден да медаль дене палемдалтше Михаил Поповын, Владимир Товашовын лӱмышт йоҥген.
Ушештараш уто огыл: таче кечылан М.Попов Афган сарын инвалидше ден «Сарын инвалидше-влак» сарыште сусыргышо-влакын «Беркут» общероссийский общественный организацийыштын Марий Эл Республикысе региональный отделений председательын полышкалышыжлан пашам ышта. Организацийын тӱҥ шонымашыже: сар гыч толшо, инвалид-шамычлан, тулык ӱдырамаш, колышо-влакын ешыштлан полышым пуаш. Митингыште тыгак Мужество орден дене наградитлалтше (колымекше) Андрей Поздеевым, тыгак медаль дене палемдалтше ятыр землякыштым, воин-десантникым, шарналтеныт.
Йошкар-Ола гыч Совет Ушем Герой Марк Евтюхин нергенат ойленыт. КПРФ-ын районысо отделенийжын вуйлатышыже Л.Иванов С.Хлыстиклан, И.Мельниковлан, В.Ивановлан, К.Ахмановлан «100-летие РККА» юбилейный медальым кучыктен.
Е.Эшкинина.
