ТАЗАЛЫК

Куд пачаш шуко, но ситышын кондат

Коронавирусын пандемийже пагытыште медицине кислородлан йодмаш поснак кугемын. Октябрьыште республикнан медицине организацийлашкыже 171 тонн кислородым кондымо, тидыже ӱмашсе тыгаяк жап деч куд пачаш шуко.
РФ Минздравын нормативше дене келшышын, у коронавирус инфекций да пневмоний дене черланыше пациент-влакым эмлаш почмо койко фондын 70 процентыштыже кислород лийшаш.
Кызыт Марий Элысе 10 инфекционный стационарыште 1247 койко уло, ты чот гыч 872 койкыш кислородым шупшмо. Тыгодым кислород полшымо дене кече еда 470 деч шуко огыл пациент шӱла.
Койко фондлан кислородым ситарашлан медицине организаций-влак кислород концентраторым, вишкыде кислородым аралыме газификаторым налыныт, больницылаште эмлыше газым кондыштарыше системым ыштеныт.
Республикын медицине тӧнежлашкыже медицине кислородым кондашлан «ТехноРемСтрой-Казань» ООО дене контрактым ыштыме. Тудын пашажым Марий Элын правительствыж ден Тазалыкым аралыме министерствыже контрольышто кучат. Обществе регионысо медицине организацийлашке кече еда 8,6 тонн кислородым конда – 7 тонн вишкыдым да 1,6 тонн газ шотаным. Йошкар-Оласе, Волжск оласе да Медведево районысо рӱдӧ больницылашке эн шуко кислород кӱлеш.

М.ИВАНОВА

Опубликовать в Одноклассники

Добавить комментарий