27 майыште Э.Сапаев лӱмеш опер да балет театрыште Юл кундем федеральный округысо музыкальный театр-влакын ассоциацийышт икымше кугу мероприятийым, опер да балет шӱдыр-влаклан гала-концертым эртарен. Тудым «Кугу Юл корно» манын лӱмденыт. Мероприятий Удмуртий Республикыште стартым налын, тиддеч вара тудо Йошкар-Олаште эртен.
Пайремым торжественно почмаште Правительстве председательын икымше алмаштышыже, тӱвыра, печать да калык-влакын пашашт шотышто министр Михаил Васютин, Юл кундем федеральный округысо музыкальный театр-влак ассоциацийын председательже, Э.Сапаев лӱмеш опер да балет театрын художественный вуйлатышыже Константин Иванов лийыныт.
Михаил Зиновьевич ӱмаште ассоциацийым чумырымо нерген кӱчыкын палдарен, тӱшкан эртарыме икымше мероприятий сай лектышан лиеш манын ӱшандарен ойлен да Константин Ивановлан волгыдо шонымаш дене у пашам сайын ворандарен колташ тыланен.
Концертым мемнан землякна, композитор А.Эшпайын «Фанфары» произведенийже дене почыныт. Лач тиде сем кум ий ончыч Э.Сапаев лӱмеш опер да балет театрым почмо годымат йоҥгалтын. Концертыште Э.Сапаев лӱмеш опер да балет театрын, Чуваш опер да балет театрын (Чебоксар), И.Яушев лӱмеш музыкальный театрын (Саранск), А.Пушкин лӱмеш Нижегородский академический опер да балет театрын, Удмурт Республикысе П.Чайковский лӱмеш опер да балет театрын артистше-влак мастарлыкым ончыктеныт. Зал тич погынышо калык «Эсмеральда», «Корсар», «Щелкунчик», «Кармен», «Спартак», «Талисман» балетла, тыгак «Пуритане», «Севильский цирюльник», «Сицилийская вечерня», «Русалка», «Евгений Онегин», «Самсон и Далила», «Арлезианка», «Риголетто», «Иоланта» оперла, «Кандид» оперетте гыч ужаш-влакым шокшын вашлийыныт. Удмурт кугыжаныш опер да балет театрын артистше Роман Владимировын «Баба Яга» куштымашыже воштылашат таратыш, чылт йомакысе Баба яга семынак керте. Э.Сапаев лӱмеш опер да балет театрын артистше-влак Ольга Челпанова ден Константин Коротков мастарлыкышт дене чотак ӧрыктареныт. Ончаш толшо-влак «Браво!» шомак дене чапле куштымашаштлан тауштеныт. Солистна-влакат Валерия Баландина, Алина Полевая, Любовь Добрынина, Павел Крючко, Александр Столбов тале йӱкышт дене кугешнаш таратышт.
Пайрем кастене оркестр дене Удмурт искусствын сулло деятельже, Удмурт опер да балет театрын тӱҥ дирижержо Николай Роготнев дирижироватлен.
Юл кундем федеральный округысо музыкальный театр-влакын ассоциацийыштын икымше пашашт моткоч кугу кӱкшытыштӧ эртен. Залыште шинчыше-влак концерт деч варат тидын нерген мутланеныт.
— Чапле концерт. Ассоциацийын тыгай пайремым мыланна пӧлеклымыжлан моткоч кугу тау. Вет ик кастене родо-тукым театр-влакын пашашт дене палыме лийын кертынна. Адакшым кажне кундем эн чапле номерым ончаш темлен, тидыже, мутат уке, кумылым нӧлта. Мемнан артист-влакат моткоч ӧрыктарышт: тале, кӧргӧ вий-куатан, шке пашаштым мастарын шуктышо улыт, — палемдышт концертыш толшо Анстасия ден Иван Ларионовмыт.
Алевтина Байкова.
Е.Никифоровын фотожо.
