Кодшо шуматкечын Кокшайск кугорнышто, Студенко ял воктене, корным вончышо шордо машина йымаке пурен. Чаманен каласыман, водитель вигак колен, а ныл еҥ сусырен. Коктынжо комышто улыт. Шордат илыше кодын огыл. Кызыт туткар могай амал дене лиймым следственный орган-влак шымлат.
Марий Элын Чодыра да сонар озанлык министерствыжын специалистше-влакын ойлымышт почеш, тений гына корныш лекше шордо, пӱчӧ, ир сӧсна дене кылдалтше туткаре 10 наре лийын. Теве тений кеҥеж тӱҥалтыште Татарстан ден Марий Эл чекыште ик водитель шордым тӱкен да верже гыч шылын. А вес водитель, тидым ужын, тергыше органыш увертарен. Тыгай сӱретат лиеда.
Марий Элын Чодыра да сонар озанлкын специалистше-влакын увертарымышт почеш, кугорнышто ир янлык дене кылдлтше туткар лийын гын, ГИБДД пашаеҥ-влакым ӱжыктыман але 112 номер дене йыҥгыртыман. Вара тушко охотнадзорын, ветеринарийын специалистше-влак мият да ир янлыкым кушко колтымо йодышым рашемдат. Тыгай сӱрет лийын гын, водитель-влаклан лӱдман огыл. Тудо туткарыште титакан огыл гын, мутым кучаш ок тӱҥал.
Тӱҥ шотышто кызыт ир янлык-влак кугорныш шыҥа да ӱвыра шуко пошымылан кӧрат лектыт. Але самырык шордо ден пӱчӧ-влакын вер-шӧрым начарын палымыштлан кӧра тыгай лиеш. Сандене водитель-влаклан тыгай годым поснак тӱткӧ лийман.
Весымат каласен кодыман: янлык тӱнялан ыштыме эҥгеклан водитель-влаклан штраф палемдалт кертеш. Мутлан, шордым тӱкымылан — 40 тӱжем теҥге; пӱчылан, маскалан — 30 тӱжем теҥге, ирсӧсналан — 15 тӱжем теҥге, мераҥлан — 500 теҥге.
С.Носова.
