15 мартлан налмаште Марий Элыште у коронавирус инфекций деч прививкым 18 тӱжем утла еҥлан ыштыме, тыгодым республикышкына кондымо вакцинын чумыр чотшо гыч 85,4 процентшым кучылтмо. 11603 еҥ вакцинацийын тичмаш курсшым эртен.
Тидын нерген регионын тазалыкым аралыме министрже Марина Панькова Марий Элышке у коронавирус инфекцийым кондымым да шаркалымым шижтарыме шотышто оперативный штабын черетан заседанийыштыже увертарен.
15 март йотке республикышкына у коронавирус инфекций деч Гам-КОВИД-Вак комбинироватлыме векторный вакцинын 21792 дозыжым кондымо. 19 медицине организацийыште COVID-19 деч прививкым ыштыме 110 пунктым почмо. Куснылшо пункт-шамычын чотыштым 50 марте кугемдыме, куснылшо бригаде-шамычын чотыштым – 52 йотке. Вакцинацийым эртарыше чыла медицине организацийыште вакциным аралаш да кондыштараш келшыше кылмыктыме оборудований ден термоконтейнер, пациентлан полышым пуашлан медикамент, пайдаланыме материал да медицине торым погымо йоҥгыт ситышын улыт.
Марий Элыште у коронавирус инфекций дене кылдалтше сӱретын саемын толмыжлан кӧра 25 январь гыч 10 медорганизацийыште CОVID-19 дене черланыше пациент-шамычлан полышым пуымо 909 койкым петырыме, 3 медицине тӧнеж профиль дене шуктымо пашашкыже тичмашнек пӧртылын. Кызыт коронавирусан черле-влаклан регионысо 7 медицине организацийын 585 койкыштыжо полышым пуат. Тиде чот гыч 32 процент койко яра шинча. Стационарыште эмлалтше 43 процент пациентлан кислород кӱлеш. М.Паньковам шодым искусственно вентилироватлыме аппаратыште улшо пациент-влакын чотышт тургыжландара. Тудо огеш изем гаяк, 21-24 цифрыште шога.
«Пытартыш кок тылзыште инфекцийым чытен лекше пациент-влакын, поснак илалше-шамычын, нелын черланымыштым эскерена. Икымше верыште – неле шӱм чер ден вӱргорно тромбоз. Самырык-влак стационар гыч лекмышт деч вара эмлыме йӧным ситыдымаш деч посна эртат», – ешарен тазалыкым аралыме министр.
COVID-19 деч амбулаторий условийыште эмлалтше, ты шотыштак стационар деч вара мучаш марте эмлалтше пациент-шамычлан эм ончычсо семынак яра ойыралтеш. Тымарте препаратым 11576 еҥлан пуымо.
Роспотребнадзорын Марий Элысе виктемжым вуйлатыше Светлана Булатован палемдымыж почеш, республикыштына пытартыш кок арняште у коронавирус инфекций дене черланыме показатель 1,46 пачаш иземын.
Марий Эл Республикым вуйлатышын организаций да
аналитике виктемжын уверже негызеш
М.ИВАНОВА ямдылен
