7 майыште Марий Эл Республикым вуйлатыше Звенигово районыш миен коштын. Александр Евстифеев Красногорский поселкысо эрыктыше сооруженийлам ончен савырнен, верысе спортзалыш пурен лектын да «Восход» стадионышто лийын.
Поселкышто футболым йӧратат, секцийлашке 100 утла еҥ коштеш, палемден Александр Евстифеев. Сандене спортзалым да стадионым республиканский да федеральный бюджет кӱшеш шотыш кондаш лийме. Стадионышто искусственный футбольный шартышым ышташ гына 10 миллион теҥгем ойыраш кутырен келшыме. Марий Элым вуйлатыше школьный спортивный стадионым 2020 ий 1 сентябрьлан ыштен шукташ кӱштен.
Александр Евстифеев тыгак эрыктыше сооруженийлам ончен савырнен. Тудыжо 1989 ий годсек кучылталтеш. Тудым уэмдаш пытартыш ийлаште 15,5 миллион утла теҥгем ойырымо. Марий Элым вуйлатыше тиде объектыште чыла пашам тений 1 октябрь марте ыштен шукташ кӱштен. Тудо республиканский бюджет гыч окса дене полшаш сӧрен.
Марий Эл Республикым вуйлатышын организаций да аналитике виктемжын уверже негызеш П.Шакиров ямдылен
