СОЦИАЛ ИЛЫШ

Кочо мыскара

Шӱк реформым илышыш пуртымо деч вара петыртышан, ораван пластик контейнер-влакым Звенигово олаште шукерте огыл веле вераҥдышт. Жап шукат ыш эрте, а Пионерский уремысе 3-шо «Б» пӧрт воктенысе ик йоҥгыт (снимкыште) «чолакышкат» савырныш.

Иктын мутшо почеш, бакыш бетон авыртышым кудалтеныт, да спецтехникын шӱкым ястарымыж годым йоҥгыт петыртыш нелытым чытен кертде катлен ойыралтын, кокымшо йӧршын вес семын ойла… Мо оҥайже: тиде контейнерым тышке вес кудывече гыч йӱдым конден шынденыт, олмешыже сайым наҥгаеныт. Контейнер площадке (тыге манаш пешыже шотлан ок тол гынат) воктенысе пӧртыштӧ илыше-влак ала-кӧмытын пычкемышыште понар дене волгалтарен коштмыштым ужыныт, но амалжым волгыжмеке веле умыленыт.

Звенигово ола кугужак огыл, сандене тиде кочо «мыскарам» ыштыше-влакым лишыл жапыште рашемдат, очыни. Уке гын, калык полиций деч полышым йодаш шона.

 

М.ИВАНОВА

Опубликовать в Одноклассники

Добавить комментарий