Марий Эл Республикысе пенсионер-влак «Интернетлан тау — 2018» всероссийский конкурсыш ушнен кертыт.
Регионыштына пенсионер-влакым компьютер грамотлан туныктымо паша ий еда вийым поген толеш. Кызыт, шке, а южгунамже шкет илышым куштылемдаш, оҥайракым ышташ манын, шагал огыл илалше еҥ Интернет дене пайдаланаш тунемеш.
А Интернет деч могай пайда уло? Тудлан лачшымак мо шотышто таушташ лиеш? Илалше да начарын тарванылше але коштын кертдыме-влакым шергакан опыт дене палдараш манын, конкурсым организоватлыше-влак лачшымак нине йодышым рашемдаш тыршат.
Конкурсыш Козьмодемьянск гыч В.Долганичева ден Юрино посёлко гыч Светлана Кочубейник регионна гыч икымше ушненыт.
«Интернетлан тау — 2018» всероссийский конкурсышто 50 деч кугурак ийготан еҥ-влак участвоватлен кертыт. Йодмашым «Портал gosuslugi.ru: мыйын опытем», «Интернетыште мыйын сеҥымашем», «Интернет – амалкалче, Интернет-пашам пуышо», «Мыйын мер Интернет тӱҥалтышем» номинацийлаш конкурсын сайтыштыже 8 октябрь марте пуыман, пеленже конкурс пашам – эссе ден фотом – пеҥгыдемдыман. Конкурсым октябрь мучаш марте иктешлаш палемдыме.
Почешмут семын. Йошкар-Оласе калыкым социально обслуживатлыме рӱдерыште компьютер грамотлан тунем лекше-влак Пенсионер-шамыч коклаште компьютер многоборье шотышто всероссийский чемпионатын регионысо VIII этапыштыже участвоватленыт.
Чемпионатысе заданий-влак Россий Пенсий фондын порталыштыже тӱрлӧ сомылым шуктымо, Яндекс кычалме системыште пашам ыштыме, пуымо темылан презентацийым ямдылыме дене кылдалтыныт. «Ӱшанлын пайдаланыше» да «Тӱҥалше пайдаланыше» номинацийлаште сеҥыше-влак Марий Эл Республикын командышкыже Пенсионер-шамыч коклаште компьютер многоборье шотышто всероссийский чемпионатын федеральный VIII этапыштыже участвоватлаш пурен кертыт.
М.ИВАНОВА
