Колым кучымаш утларакше пӧръеҥ сомыллан шотлалтеш. Но пытартыш жапыште ӱдыр ден ӱдырамаш-шамычат тиде пашалан утыр шӱмаҥаш тӱҥалыныт. Теве У Торъял районысо «Рыболов» клубын колызыжо-влакын сентябрь кыдалне эртыше таҥасымаштышт лиймем годым икмыняр ӱдыр ден ӱдырамашым ужым.
Иктыже — Татьяна Алексеевна Пирогова. Тудо У Торъялысе школ-интернатыште 40 ий фельдшер-медсестралан пашам ыштен. Кызыт – сулен налме канышыште. Сандене йӧратыме сомылжылан жапше утларак уло.
А колым кучаш ӱдырамаш, шкенжын ойлымыж почеш, чынжымак, чотак йӧрата. Тидлан тудо изиж годымак шӱмаҥын. Но вараже ты сомылым тӱрлӧ амаллан кӧра «мондашыже» логалын.
— Лу ий наре ончыч уэш кумылаҥаш Шернур район Марисола села гыч Зинаида Васильевна Ермакова полшен. Тудак мылам эҥырвоштырым пӧлеклен да угыч йоча годсо жапышкем «пӧртылтен». Ме тудын дене эше турист улына, — рашемдыш Татьяна Алексеевна.
Кол кучаш ончычшо ӱдырамашын марийже, Владимир Васильевич, шкетын гына коштын. А кызыт тудо ватыж деч посна ик ганат огеш кай – эре пеленже налеш.
— Мӧҥгыштӧ чоҥымо пашам тӱҥалынна гынат, садак чонланна келшыше сомылланат жапым муашак тыршена. Вет тиде нерв системым лыпландараш полша, шӱмлан пайдале, эмым вашталта, чыла гаяк чер деч эмла да тазалыкым ешара. А колжым кучет гын, эше кочкат, — шыргыжалын палемдыш чолга колызо. — Мо логалеш, ме нимомат арам огына локтыл. Мутлан, изи кол гыч консервым ыштена.
А кол кучымаш нерген ӱдырамаш кугу кумыл дене каласкалыш да шижалте: тудо марийжым шкетшым колташ лӱдеш да «оролаш» огыл пырля кая, а тиде сомыллан чынже денак чотак шӱмаҥын. Сандене ончыч пӧръеҥ кугу колызо лийын гын, кызыт кудыжо чолгарак – эше шоналташ кӱлеш.
Такшым колым кучымаш, чынжымак, моткочак пайдале сомыл. Тидым диваныште телевизорым ончен шинчыме дене, мутат уке, йӧршынат от таҥастаре. Сӧрал пӱртӱс, яндар юж, тулото, воктенет – йӧратыме пелашет. Шкем пиаланлан шотлаш южгунамже шукат огеш кӱл. Кеч кокланже лу мартеак кылмен пыташ логалеш гынат, тиде сомыл чонетлан келша гын, тыгайым шотыш налат мо?
Любовь Петрова.
Авторын фотожо.
