3-5 октябрьыште Ханты-Мансийск олаште «Ханты ясанг» газетын 60 ияш лӱмгечыжым, тыгак «Ленин пант хуват» («Ленин корно дене») газетын икымше редакторжо Г.Лазаревын 100 ияш лӱмгечыжым пайремлат. Тиде кышкарыштак Финн-угор прессын VIII всероссийский фестивальже эрта.
Лӱмгече мероприятийыш, фестивальыш Удмурт, Мордва, Марий Эл, Коми, Башкортостан республикла, Пермь кундем, Ямал-Ненец автономный округ гыч финн-угор журналист-влак мият.
«Ханты ясанг» газетын икымше номерже 1957 ий 1 ноябрьыште лектын. Икымше редакторжо фронтовик, хант писатель Григорий Лазарев лийын. Таче газет Югра кундемыште илыше тӱп калык-влакын илышышт дене палдара.
Финн-угор прессын всероссийский фестивальже икымше гана 2003 ийыште Йошкар-Олаште эртен. Тидын деч вара тудо ятыр финн-угор регионлаште журналист-шамычым чумырен, Юграште икымше гана лиеш.
Лӱмгечыш да фестивальыш мийыше-влакым поян программе вуча. Журналист-шамыч Хант-Манси автономный округын Думыжын депутатше-влак, Югра кундемысе Йӱдвел кундемыште илыше изи чотан тӱп калык-влакын ассамблейыштын еҥышт дене вашлийыт,пленарный заседанийыште, «Финн-угор СМИ-шке у увер технологийым шыҥдарымаш» «йыргешке ӱстелыште» кӱлешан йодышым каҥашат,тыгак Ханты-Мансийск олан историй ден этнографий, тӱвыра ден тунемме тӧнеж-влакын пашашт дене палыме лийыт. Мучаште фестивальын конкурсыштыжо сеҥыше журналист ден редакций-влакым палемдат.
Л.ШАБДАРОВА.
