И.С.Палантай лӱмеш тӱвыра да сымыктыш колледжын студентше Константин Рябин Россий кӱкшытан иканаште кок конкурсышто сеҥышыш лектын.
К.Рябиным Марий Элыште веле огыл, тудын деч ӧрдыжтат тале баянист семын сайын палат. Китайыште конкурсышто лиймыж деч вара Константин – тӱнямбалсе эн виян шым баянист коклаште. Но тиде тудын икымше сеҥымашыже огыл.
Кодшо кечылаште землякна икымше степенян лауреат лӱм дене кок дипломым конден. Баяным мастарын шоктымыж дене тудо «Молодые дарования России» конкурсышто жюрин еҥже-влакым чотак ӧрыктарен. Ты конкурсым Москошто П.И.Чайковский лӱмеш кугыжаныш консерваторий пеленысе академический музыкальный училищыже эртарен. Тудо идалык жапыште икмыняр йыжыҥ дене лийын. Сеҥыше-влакым 7 декабрьыште саламленыт.
Тиддеч вара арнят эртен огыл, самырык музыкант Москоштак «Баян и баянисты» тӱнямбал кӱкшытан XXXI фестивальыште лийын да сеҥышыш лектын. Конкурс Гнесинмыт лӱмеш Россий музык академийыште 11 — 15 декабрьыште эртен. Участник-влакым Российын калык артистше-влак Ф.Липс ден Ю.Дранга акленыт.
А.БАЙКОВА
Фотом Вконтакте соцсеть гыч налме
