Кодшо арнян Федеральный рӱдерын врачше-шамыч Йошкар-Олаште илыше йоча-влакын тазалыкыштым тергеныт. Тиде мероприятийым Российын Тазалыкым аралыме министерствыжын Юл кундемысе федеральный медицине шымлыме рӱдерже, Марий Эл Республикын Тазалыкым аралыме министерствыже да Марий кугыжаныш университет организоватленыт.
Мероприятийыште 90 утла еҥ участвоватлен: педиатр, тӱшка практике врач, гастроэнтеролог, ортопед, невролог, МарГун-студентше-влак.
Нижний Новгородышто верланыше Эмлыме-профилактический да научно-шымлыме шуко профилян кугу комплекс, федеральный рӱдер дене Марий Элын врачше-шамыч шукертак пеҥгыде кылым кучат, тусо специалист-влак деке неле патологиян йоча-влакым тергаш да эмлалташ колтат. Рӱдер 30 утла направлений дене специализироватлыме полышым пуа.
Конференцийын участникше-влак йоча церебральный параличын диагностикыже, икшывын психо-речевой вияҥмашыже, шолын пуалше черже, инфекцийын профилактикыж дене кылдалтше йодыш-влакым лончыленыт.
Нижний Новгород гыч толшо-врач-влак: гастроэнтеролог, ортопед, невролог да молат Йошкар-Олаште илыше 21 икшывын тазалыкшым тергеныт, кок изи пациентым федеральный рӱдерыште эмлалташ ӱжыныт.
М.ИВАНОВА.
