Юрино районысо исторический ик кумдыкышто «шем пургедше-влак» озаланеныт. Тиде амал денак пеш писын тушко марий археолог-влак лектын коштыныт да шымлыме пашам эртареныт.
Ты вержым нуно «Выжумский шӱгарла» манын лӱмденыт. Тушто марий-влакын X–XII курымлаште илымышт палдырна. Молан пеш писын ты верыш лекмыштымат умылаш лиеш: шем пургедше-влак 100 квадрат метр кумдыкым локтылынат шуктеныт. Археолог-влаклан нунын почеш пашам ышташ куштылго огыл, вет исторический тыгай вершӧрышто мландын кажне лончыжо могай-гынат уверым пуэн кертеш.
МарНИЯЛИИ-н научный экспедицийжым лӱмлӧ археолог Татьяна Никитина вуйлатен. Шымлызе-шамычлан пургедме пашам эртараш волонтёр-влак, Угарман областьысе Воскресенский посёлкысо школын тунемшыже-влак, полшеныт.
С.НОСОВА
Снимкыште: экспедиций годым.
