Пенсионер-влак коклаште компьютер многоборье дене IX всероссийский чемпионатын регионысо этапыштыже сеҥыше-влак Киров олаш миеныт.
4-6 июньышто эртыше чемпионатыште Марий Элын чапшым Олег Борискин (Курыкмарий район, «Тӱҥалше пользователь» номинацийыште сеҥыше) ден Татьяна Огородникова (Кужэҥер район, «Ӱшанле пользователь» номинацийыште сеҥыше ) араленыт. Пеленышт «Россий пенсионер-влакын ушемышт» общероссийский мер организацийын Марий региональный пӧлкажын председательже Людмила Ефремоват миен.
Ушештарена: Пенсионер-влак коклаште компьютер многоборье дене IX всероссийский чемпионатын регионысо этапше тений 9 март гыч 18 апрель йотке эртен. Тушто олаласе да районласе калыкым социально обслуживатлыме комплексный рӱдерлаште компьютер грамотлан тунемше ден Марий Кугыжаныш университет пеленысе Кумшо ийгот университетын слушательже-влак – чылаже 98 илалше еҥ – участвоватленыт.
М.ИВАНОВА
Снимкыште: Марий Элын командыже.
Фотом Марий Элын Социальный вияҥмаш министерствыжын сайтше гыч налме.
