Шӱртӧ дене веле огыл, тасма денат тӱрлаш лиеш улмаш. Теве Йошкар-Ола гыч Светлана Романова куд ий ончыч тиде пашалан шӱмаҥын.
Паша манашыже йылмат ок савырне, исскуство — утларак келшен толеш. Ты але вес сӱретым келыштарышашлан тасмажым туге моштен савыралаш кӱлеш… Ты искусство 350 ий ончычак Францийыште шочын, санденак тудым атлас тасма дене француз тӱрлымаш маныт. Тунам тасма дене окнаш сакыме шторым, кӱпчыкым, покрывалым, мебельым сӧрастареныт. Икманаш, тыглай арвереш, поянрак ончалтше манын, турым келыштареныт. Утларакшым тудо пытартыш жапыште шарлен. Ты кидпашалан сайын тунем шуктышыжо сӱретымат рамыш келыштара. Тӱрлымо тыгай радынаже, кызытсе семын ойлаш гын, 3D але 5D семын ончалтеш.
«Тасма дене тӱрлаш тӱҥалаш нелыжак огыл, кумыл гына лийже, — ойла Светлана. Ямде изделийже чынжымак пеш сылне улыт. Тыгай тӱр дене тудо сумкамат, чондайымат, шергакан але вес настам пышташ корбкамат, панномат, упшымат, шовычымат, тувырымат сӧрастара. Икманаш, шке кид дене сылне деч сылне кеч-могай арверым ямдылаш лиеш. Манмыла, фантазийлан мучаш уке.
Светлана шкеже бухгалтерлан ышта. Яра жапше шагалрак гынат, тидлан туге шӱмаҥын, кажне кас еда шинчылтеш. Тӱрлымӧ арвер ситышын погынымеке, Марий изобразительный тоштер пашаен-влаклан нуным ончерыште ончыкташ темлен. Тыгак ынде тӱрлӧ вере икмыняр выставкыже эртен. Эшежым тоштер пашаеҥ-влак тудлан тиде мастарлыклан туныктымо студийым почаш темленыт. Кызыт тушко тӱрлӧ ийготан ӱдырамаш-влак коштыт. Сандене шуматкече еда кок группым туныкта. Тушко коштшо-влакын шкеныштынат ынде ончыктышашлык пашашт ятыр погынен. Йошкар-Олаште эртыше Пеледыш пайрем годым нунын пашашт дене палдарыше ончер Сеҥымашын ХХХ идалыкше лӱмеш тӱвыра полат ончылно эртыш.
«Чон куана, кунам пеледыш пеледмым ужат. Мыят кажне пашашкем чонем пыштем, сандене ямде арверлан шкат куанем, весе-шамычынат кумылыштым нӧлтем. Шукышт тиде неле паша маныт. Чынжымак, шӱртӧ дене тӱрлымӧ семынак пырчын-пырчын шинчылтман. Южо сӱретшылан икмыняр тылзат кая. Кеч нуно сайын ужалалтыт манын ом керт. Но шке кид дене ыштыме сӧрал настам ужатат, тидлан утларак кумыл гына лектеш, — каласыш Светлана.
С.Носова.
М.Скобелевын фотожо.
