Шукерте огыл Чебоксарыште «Русь мастеровая» калык прикладной сымыктыш мастар-влакын ХIX всероссийский конкурсышт эртен.
Тудым Россий Тӱвыра министерстве, В.Д.Поленов лӱмеш Российысе калык усталык рӱдер, Чувашийын Тӱвыра министерствыже да Чуваш калык усталык рӱдер иквереш эртареныт. Марий Эл гыч тушко Шернур районысо кидмастар-влак миеныт. Но ончыч нунылан оргкомитетын ойырен налме туржым эрташ да «конкурсын участникше» статусым налашышт логалын. Теве кӧ нуно улыт: шун мастар Валентин Петрович Алгаев, тӱрызӧ-влак – Ольга Павловна Антропова, Алефтина Ивановна Медведева да Эрик Иванович Бусыгин.
Конкурс кузе эртымым тӱшка калык иканаште ужын да аклен кертын. Икманаш, калык ончылнак нуно палемдыме теме дене кидпашам ыштеныт. А темыжым участник-влакын организационный погынымашышт годым веле пуэныт. Конкурсын девизше тыге йонген: «Вий да моторлык – пырляште». Девизыштыжак пуымо темын негызше ончыкталтын: «НИМЕ — ХАВАТ» – марла ойлаш гын «вӱма» умылымашым – тӱшка калыклан але ик ешлан полшымо шот дене пырля ыштыме пашам ончыкта.
Тӱрызо Ольга Антроповалан «Ниме Хават — Вӱма Вий» темылан тӱрым ышташ логалын. Алефтина Медведева «Мунлык пушеҥгым» турлен. Тудланат тыгак пашашкыже марий дене пырля чуваш калык мотивымат пурташ кӱлын. Эрик Бусыгин сӱан ӱштыш пижыктыме «Сугынь» темылан сакышым тӱрлен. Тыгай сылнештарышыже марийын веле огыл, чуваш-шамычынат лийын да уло.
Жюрин иктешлымашыж почеш, Марий Эл гыч мийыше-влак чыланат конкурсын участникше лиймым пеҥгыдемдыше диплом дене палемдалтыныт. Валентин Петрович конкурс жапыште эше «Илыш мундыра» композицийым шун гыч ненчен ямдылен. Тиде изи огыл паша чуваш да марий вургемым «чиктыме» ныл фигур гыч шоген. Композицийын рӱдыжӧ – фигур-влак калык коклаште кыл улмым, ваш келшен, эҥертен илымым ончыктышо символым – «илыш мундырам» – кучат. В. Алгаев конкурсышто кокымшо верым налын да традиционный калык сымыктышым арален да вияҥден толмылан кокымшо степенян диплом дене палемдалтын.
С.Носова
В.Алгаев – шке пашаж дене.
