КУЧЕМ УВЕР

Кеҥеж пайдалын эртышаш

Республикыште илыше 17 тӱжем йочалан тений пайдалын канаш да тазалыкым пеҥгыдемдаш йӧн лиеш. Тидын, тыгак 2018 ийлан муниципальный нормативный правовой акт регистрым ыштыме, тунемме вер ден медицине организацийлаште леведышым олмыктымо нерген Марий Эл Правительствыште регион вуйлатыше А.Евстифеевын эртарыме заседанийыштыже мутланеныт.

Регистрым шуктымо пашалан Элкӧргӧ политике, верысе кучем вияҥме да юстиций министерстве вуйын шога. А.Евстифеев район вуйлатыше-влак ты шотышто лектыш дене палдараш кӱштен. Тыге тений 31 мартлан регистрыш 46,5 тӱжем правовой актым пуртымо.

Шушаш кеҥеж каныш нерген Марий Эл образований да науко министр Н.Адамова каласкален. Тудым мутшо почеш, йоча-влаклан канаш да тазалыкым пеҥгыдемдаш тений республикысе да районласе бюджетла гыч чылаже 80 миллион 714 тӱжем теҥге ойыралтеш, ӱмаште 76,3 миллион теҥге лийын. Тений республикыште 188 тыгай вер лиеш, тушто чумыр налмаште 17 тӱжем икшыве канаш тӱҥалеш. Тиде чот гыч 7 тӱжемже – илышыште нелылыкыш логалше-влак. Ныл тӱжем тунемшым кундемна деч ӧрдыжкӧ колташ палемдыме, нунын кокла гыч 300 еҥжым – «Артек», «Орлёнок», «Смена», «Сириус» федерал рӱдерлаш. 34 тӱжем ӱдыр-рвезым «шагал роскотан каныме йӧн» авалта, рашрак ойлаш гын, нуным пукшаш огыт тӱҥал. Кызыт Марий Элыште Роспотребнадзор виктем тазалыкым пеҥгыдемдыме 175 организацийым санитар-эпидемиологий могырым сайлан шотлен. Республикым вуйлатыше правительстве член-влаклан тиде пашам кӱлеш семын эртараш, шукырак икшывым авалташ кӱлмым палемден.

Кумшо йодыш тунемме вер да медицине организацийлаште леведышым олмыктымо дене кылдалтын. Марий Эл образований да науко министр Н.Адамова ден тазалыкым аралыме шотышто министр М.Панькован ойлымышт почеш, республикысе 16 образовательный организацийын леведышыжым капитально ачалаш 50 миллион теҥгем ойырымо. Кызытеш  проект-смете документым ямдылыме, конкурс-шамыч эртат. Ялысе школлаште ты пашам 17 август марте мучашлаш палемдыме.

Тазалым аралыме тӧнежлаште леведышым олмыкташ Марий Эл правительствын резерв фондшо гыч 12,6 миллион теҥгем ойырымо. Тиде да ешартыш (предприниматель-влакын полышышт) окса дене 5 тыгай верым авалташ палемдыме: Медведевысе рӱдӧ эмлымверым, Якимово ялысе фельдшер-акушер пунктым, Йошкар-Оласе 2-шо №-ан поликлиникым, Козьмодемьянскысе межрайонный эмлымверым, 1-ше №-ан медико-санитарный частьын стационарже ден поликлиникыжым.

Тидын деч посна правительстве 7 миллион тенгем Параньга да Марий Турек рӱдӧ эмлымвер-влакын леведышыштым уэмден олмыкташ ойырен. Регион вуйлатышын кӱштымыж почеш, олмыктымо паша 17 августышто мучашлалтшаш.

Марий Эл Республикым вуйлатышын организаций да аналитике виктемжын уверже негызеш Г.Кожевникова ямдылен.

   

Опубликовать в Одноклассники

Добавить комментарий