27 августышто Чайковскийыште кеҥеж биатлон дене тӱнямбал чемпионат иктешлалтын. Тушто землячкына Надежда Белкина (Провой кундемын шочшыжо, Украинын сборный командыжын чапшым арала) ший призёр лийын. Марий ӱдыр кок стартыш лектын. Спринтыште кокымшо рубежыште Надежда финишыш визымше толын. Тунам Олимпийский чемпионко С.Слепцова деч 1 минутат 12,7 секундлан почеш кодын. Ик кече вара куржмаште (преследований) Надежда кокымшо верыш лектын. Ныл рубеж гыч иктыштыже кок штрафым налын. Варажым ик йоҥылыш деч посна лӱйылтын. Ты гана Н.Белкина ден Слепцова коклаште 12 секунд ойыртем лийын. Палемдыман, Светлана эртыше рушарнян кугу спорт гыч каен.
Е.Эшкинина.
