САМЫРЫК ТУКЫМ

Кеҥежын ик волгыдо татше

19-26 августышто Ленинград область Смолячково посёлкышто самырык-влаклан пӧлеклалтше Йӱдвел-Касвел кундем федерал округышто «Ладога-2021» тунемме форум эртен.

Марий Эл гыч ты мероприятийыш Марий Турек район Яшмет ял гыч Ульяна Ямбарцева миен коштын. Тидын нерген Марий кугыжаныш университетын студенткыже теве тыге палемдыш:

«Мый «Самырык-влакын ушемыштым вияҥдымаш» направленийым ойырен налынам.

Шым кече жапыште шагал огыл лекций ден спорт программыш ушненна. Спикер, театр да кино актёр-влак дене вашлийынна.  Уна-влак кокла гыч эн палымыже – «Кухня» сериалын тӱҥ геройжо  Марк Богатырёв, «Деффчонки» сериалын актёржо Анастасия Денисова, тыгак актёр Андрей Носков, мурызо, блогер Роман Каграманов, журналист Анатолий Вассерман.

Форум кышкарыште грант конкурс лийын. Тушто эксперт-влак ончылно проектем араленам. Тидыже мылам – пашамланат, усталык саскам еҥлан ончыктымаштат, пеш кугу опыт.

Мероприятий жапыштак «Поро паша» фестиваль эртаралтын. Тудын ик ужашыже тыгай лийын: кажне кумылан еҥ анализым ыштыкташ шӱвылжым сдатлен кертын. Лектышыже почеш лувемым (костный мозг) сдатлыше донор коклаш ушнаш йӧн лийын. Мыят тидым ыштенам.

Кажне кечын мо-гынат оҥай да пайдале лийын. Мутлан мылам тӱрлӧ мастер класс, тренинг-влак келшеныт. Калык ончыко лектын, шкем ӱшанлын кучаш туныктымым пеш кӱлешанлан шотлем. Тудым Санкт-Петербург оласе актёр импровизаций школын вуйлатышыже Никита Меньшов эртарен.

Мероприятийыш ушнымем кеҥежын ик эн волгыдо татшылан шотлем. У йолташ-влакым вашлийынам, шинчымашем нӧлтенам – тиде мылам пеш шерге.

Йолташ-влак, тӱрлӧ форумыш, конкурсыш, олимпиадыш ушнаш ида ӧр. Шкем участник семынат, волонтёр, организатор семынат терген ончыза. Тыге келшыше корным ойырен налаш куштылгырак».

 

О.МОШКИНА

Опубликовать в Одноклассники

Добавить комментарий