Шокшо пагытлан шукынжо куаненыт, шонем. Самырык тукым кеҥежым кузе эртара, айста шкешт деч пален налына.
Надежда Копытова, Кудымкар:
— Ты жапын пайдаже пеш шуко: витаминлан поян емыж ден пакчасаска кӱын шуыт, кечыште лиймылан кӧра тазалык пеҥгыдемеш. Кужун вучымо отпускем толын шумылан куаненам. Кечывалым пляжыште лияш, кастене ола урем дене кошташ келша.
Дина Давыдова, Килемар район:
— Идалыкын кажне пагытше сылне, но лач кеҥежым каналташ, лишыл еҥ-влак дене жапым эртараш йӧн шукырак. Кажне кечын йолташ-влак дене вашлийына. Пырля погынен, Юл серыш коштына. Тушто, пӱртӱс лоҥгаште, поснак ласка. Омыдымо йӱд, тулото йыр мурым мурымо, шуко весела тат-влак – тиде мыйын кеҥеж.
Татьяна Иванова, Морко район:
— Тиде сылне пагыт тӱрлӧ чиян пӱртӱс, солымо шудо пуш, эр лупс, йӱштылаш ырен шушо вӱд дене куандара. Кызыт пашаште, йочасадыште, улам. Идалык еда пуымо канышыште лийме деч вара икшыве-влак толын ӧндалмышт, пеледышым пӧлеклымышт поснак шерге. Мылам тӱрлӧ олаште лияш, вес калыкын тӱвыраштым шымлаш пеш келша. Кеҥежым корнышто эртараш сай лиеш ыле, шонем.
О.МОШКИНА
