Школысо урок-влак шеҥгелан кодыныт. Игече йӱштылаш, капым кечыште кӱкташ йӧным огеш ыште гынат, йоча-влак кеҥеж канышым тӱрлӧ семын эртараш йӧным муыт. Икте ер, эҥер воктене колым эҥыра, весе йолташыж дене мечым чумен коштеш, кумшо тӱрлӧ модышыш ушна. Но шукынжо школ пеленсе лагерьыште жапыштым пайдалын эртарат.
Теве Йошкар-Оласе 2-шо №-ан школын икшывыже-шамыч мийымына годым футбол дене модыт ыле. Рвезе-влак, кок командылан шелалтын, мечым икте-весылан капкаш пурташ тыршеныт. Ик командыже виянрак улмаш, тудо 6:0 счет дене сеҥыш. Но сеҥалтше-шамычын чурийышт ойганыше лийын огыл. Нуно тугак уремыште юарлен модыныт, южышт школыш вӱдым йӱаш куржын пуреныт.
А ӱдыр-влакше спортзалыште пионербол дене модыныт. Кӧ командыш пурен огыл гын, баскетбол корзиҥгаш мечым кышкен. Икмынярын гимнастике упражненийымат ончыктеныт. Нуно шпагатыш лӱдде шинчыныт. Тугеже школышто спорт илыш виян кая манын шоналтышым. Тидым лагерьым вуйлатыше Наталья Васенёват пеҥгыдемдыш. Тудын мутшо почеш, физкультурым туныктышо Марина Румянцева йоча-влакым спортлан кӱлынак шӱмаҥда.
Школысо «Кече» лагерьыште ныл отряд пашам ышта: «Шӧршудо», «Тулойып», «Апельсин», «Шыргыжмаш». Чылаже лагерьыш 100 икшыве коштеш. Тудо 1 июньышо почылтын да 21 июньышто петыралтеш.
— Кажне кечын кечывал деч ончыч ме культур полат-влакын эртарыме тӱрлӧ мероприятийышкышт, тоштерыш, кинотеатрыш, театрыш коштына. Теве лач тачысе кечым спорт илышлан пӧлекленна. А кечывал деч вара школышто модына, сӱретлена, тӱрлӧ конкурсым эртарена. Шукерте огыл «Сурт вольык» конкурс эртен. Тушто икшыве-шамыч сурт пелен илыше вольыкым, кайыкым сӱретленыт. Тыгак муро конкурсат лийын. Кажне отряд шкеж нерген мурым ямдылен да тудым жюри ончыко аклаш луктын. Тыгак тӱрлӧ вертушкым эртарена. Нуно икте-весым лишкырак пален налаш полшат. Спорт ориентированийышкат тунемшым ушена. Нуно картычке почеш станцийлам кычалыт. Лагерьыште икшыве-влакым кечылан кок гана пукшат, сандене нунылан мемнан дене моткоч келша, вет иканаште каналтат, жапымат пайдалын эртарат, — палдарыш кугурак вожатый Алена Горбунова.
«Кече» лагерь тений спорт да тазаҥдыме теме дене пашам ышта, сандене зарядкылан кугу верым ойырат. Тыгак лӱдыкшыдымылык технике шотыштат икшывылан кажне кечын ушештарат. Ӱдыр-рвезе-шамыч пелен вич вожатый уло. 7-8-ше класслаште тунемше-влак тушто шкешотан практикым эртат, туныктышыштлан полшат.
— Школ пеленсе йоча лагерьыште ынде кокымшо ий почела ыштем. Мылам икшыве дене жапым эртараш моткоч келша. Тыгак нуным лишкырак пален налаш йӧн уло. Тидыже ончыкылык профессийыштем полшышаш, вет мый туныктышо лийнем, — мане вожатый, 8-ше классыш вончышо Ольга Денисова.
2-шо №-ан школышто ачалыме бригаде ден экологий отрядат пашам ыштат. Икымшышкыже 10-шо класс гыч 25 еҥ коштеш. Нуно школым у тунемме ийлан ямдылат, пуракым ӱштыт, чиялташ полшат. А экологий отряд 7-8-ше классыште тунемше 43 еҥым чумырен. Нуно школ йыр улшо клумбылашке пеледышым шындат, вӱдым шават, шӱкшудым кӱрыт.
Л.ШАБДАРОВА.
М.Скобелевын фотожо.
Снимкыште: Йошкар-Оласе 2-шо №-ан школын рыезыже-влак кеҥеж канышыштым пайдалын эртарат.
