Кеҥеж – шуко тунемшын эн вучымо пагытше. Каныш кечылаж верчынак, очыни. Самырык ӱдыр-рвезе-влакын яра жапышт мыняр лектын! Тудым пайдалын эртараш шонеда гын, Республикысе добровльчество аланыште полышым пуышо ресурс рӱдерыш миен толза.
Ресурс шукерте огыл почылтын гынат, шке пашажым пеш чулымын шукта. Россий кӱкшытыштӧ эртаралтше кажне манме гаяк акцийыште, конкурсышто, вес мероприятийыште шкенжым чолган ончыкта. Мутлан «Мы вместе» акцийыш тудын гоч 331 волонтёр ушнен. Тышеч 144-же пандемий годым илалше, начар тазалыкан-влаклан полышым пуымыштлан Россий Президентын медальже дене палемдалтыныт.
Проектлам возымаште да тудым илышыш шыҥдарымаштат ресурс рӱдерлан эҥерташ лиеш. Тыгак ыштеныт волнтёрство аланысе Республик вуйлатышын грантшылан конкурсышкыжо ушнышо-влак. 2020-2021 ийлаште сеҥышыш 18 паша лектын.
Портфолиом погышо студент-влаклан мероприятийлашке ушнымым ончыктышо кагаз кӱлеш. Тидын шотышто добровльчество аланште полышым пуышо ресурс рӱдерын вуйлатышыже Евгения Кудрявцева тыге вашештыш:
– Кызыт кажныжын волонтёр улмым ончыктышо книжкаже уло. Тушто ыштыме чыла паша палемдалтеш. Копийжым портфолиош ешараш лиеш.
У еҥым ме уло кумылын вучена. Шке кумылын поро пашам шукташ кумылда уло гын, ушныза мемнан чолга ешыш.
О.МОШКИНА
