ЙӰЛА

Кечышот ден калык пале:

 Марий йӱла почеш:

29 — Турек пазар.

Кумалтышын чинче тушыжо

Эрдене, шӱргым шӱялтен, кече ваштареш шогалын, пелештыме мут:

 Поро Ош Кугу Юмо, Кече Ава, Шочынава, Юмо Пӱрышӧ, Юмо Серлагыш! Эрдене помыжалтын, яндар вӱд дене шӱргем шӱялтен, Поро Юмем деч, пелештен, полышым йодам. Те кугу виян улыда, шеме ден ошым ужыда, сай ден осалым ойыреда. А таче кечын мом ужаш, колаш логалеш, чылажымат кӱлеш семын вашлияш ӱнарым пуэн шогыза. Кумылемат ида волто, поро сомылым ыштен шогаш, шочшем, ешем кучаш сай серлагышым пуэн шогыза. Коштмо корныштем, ыштыме сомылыштем полшаш шонышо еҥым луктын шогыза, осалжым кораҥден шогыза. Коштмо корныштемат арален шогыза, илыме суртемат волгалтарен шогыза.

Сортам чӱктымӧ годым пелештыме мут: «Тул Ава, саска сорта! Сортам чӱктен пелештымем Юмо деке намиен шуктыза, сай серлагышым ыштыза».

Вольыкым шӱшкылмӧ годым пелештыме мут: «Ош Кугу Юмо! Айдеме кучымо вольыкетым шкаланет йӧршын эрыктен, ышташ-кучаш ыштен, чонжым йӧратен нал».

(«Кумалтыш мут» брошюр гыч налме Йошкар-Ола. 2018)

 Калык пале:

Телым эн кӱчык кече жапын йӱштӧ шога гын, кеҥеж шокшо лиеш.

Январь мучашыште, февраль тӱҥалтыште леведыштӱр ий кужу лиеш, кеҥеж кукшо толеш.

Пырыс чӱчкыдын йӱэш — игече пужла.

Поранлан кӱдыр-влак лумыш пургед возыт.

Корак ӱлыл укшлаш шылеш — мардеж тарвана.

Шулдыран ой:

Шинча айдемын чонжо.

Кинде-шинчал деч кугу от лий.

Чоҥештыше кайыкым кучаш ок лий, эртыше ӱмырым савыраш ок лий.

Ужшо — корнышто, уждымо — коҥгамбалне.

Массат шке игыжым йӧрата да кинде пышташ ок туныкто.

Писе товар мекшан пушеҥгеш катла.

 С.НОСОВА

Опубликовать в Одноклассники

Добавить комментарий