Кумалтышын чинче тушыжо
«Нур ото гай атыланен, нур куэла ошемын, нур куэла йолваланен, икияш воштырла ӱмырым шуен, кӱ курыкла куанен, курык ӱмбал саскала пеледын, эр ӱжарала волгалтын, эр кечыла нӧлталтын, кечывал кечыла шарлен илаш ий гыч ийыш йодына. Модын-воштыл илен, ӱмырым эртараш поро жапым пуэн, пӱрен шого.
Мемнан кумалтышнам ӱлыл тӱтыра кӱш кӱзыктыжӧ, кӱшыл тӱтыра ӱлык волтыжо. Алал кумылна алал лийже.»
(В.Т.Михайловын «Калык ойпого — калык чон поянлык» книгаж гыч налме. Йошкар-Ола. 2017 ий.)
«О, Сурт юмо, Сурт пӱрышӧ! Пурен-лекме оралте гыч, сурт кӧргӧ еш гыч, вӱта кӧргӧ вольык гыч, сад-тошкем кӧргӧ мӱкш гыч ида кӱрылтаре, а вуй, шинча-пылыш, кид-йол, шӱм-мокш, пагар-верге, пӱй, шодо корштымаш дечын, могыр удыртыш дечын, неле еҥ чер дечын, тӱнямбалне коштшо чер дечынат араленак шогыза. Тора корно дене коштмаште, йолын, орва дене, кугыжан вӱд валне кӱртньӧ пуш дене коштмаштат, южышто кӱртньӧ кайык дене чоҥештымаштат, кӱртньыгорно валне аралыза!…
(«Кумалтыш мут» (Марий книга савыктыш, Йошкар-Ола. 2018) брошюр гыч налме.)
Шулдыран ой-влак:
Еҥ чон вес еҥлан ок кой.
Лишыл пий вашкерак пурлеш.
Мо нелын налалтеш, тудо шергын аклалтеш.
Айдеме чон вакш агур гай келге.
Ават гай калыкетым йӧрате, ачат гай арале.
Кодшо пашаш лум лумеш.
Ойӧрӧ-влак:
Кӱмыж-совлам йӱк деч посна муш, мурыктыл мушкат гын, ешыште тума лектеш.
Атышӧрым мушде шинчыкташ ок йӧрӧ — чер гыч от лек.
Кӱвар мушмо годым куштырам кодаш ок йӧрӧ — шӱргет араван лиеш.
Пӧртым ӱштмек, шӱкым шала кодаш ок йӧрӧ — порысет ӱмыреш ок пыте.
(«Запреты в системе воззрений мари» филологий науко кандидат Л.А.Абукаеван моногорафийже гыч налме.)
С.НОСОВА
