22 июньышто Йошкар-Олаште Марий Эл МВД-ын ончычсо министрже, Йошкар-Олаште «Истоки» Шернур землячествын икымше вуйлатышыже генерал-майор В.Смоленцев лӱмеш рӱдоласе землячествыла гыч ветеран-шамычын командышт коклаште футбол дене мини-турнир эртен.
Пел ий жапыште землячествын тыршымыж дене эртарыме тиде кокымшо кугу мероприятий лийын. Тылеч ончыч поэт да киноактер Йыван Кырлан шочмыжлан 110 ий темме лӱмеш поро кумылым ончыктышо концертым эртарыме. Мини-турнирыш Шернур («Истоки»), Марий Турек («Турек»), Советский («Советчане»), Курыкмарий («Акпарс»), Волжский (Юлсер) район-влакын, тыгак эрвел марий-шамыч «Ош Виче» землячествышт («Эрвел марий») ушненыт. Тылеч посна Шернур гыч «Сокол» командын ветеранже-шамыч лийыныт, Курыкмарий кундемыште шочын-кушшо да шке жапыштыже МВД системыште ыштыше-влакат командым чумыреныт ыле.
Мероприятийым землячестве вуйлатыше Е.Пайдышев почын. Саламлыме мутым Марий Эл правительстве председательын алмаштышыже С.Воронцов ойлен, шкежат Советский районын землячествыжын командыштыже модын. Сай тӱҥалтышым шотыш налын, тыгай турнирым лишыл жапыште, мутлан, волейбол дене, эртараш темлен. В.Смоленцевын пелашыже Галина Анатольевна ден Татьяна ӱдыржӧ лишыл еҥыштым шарнымылан еш лӱм дене тауштеныт. Виктор Васильевичын йолташыже, отставкысе полковник В.Онучин тудын лӱддымылыкшӧ, пеҥгыде улмыж нерген ойлен. Саламлымашке тыгак Марий Эл МВД-ын ветеран-влак советшым вуйлатышын алмаштышыже В.Южаков ушнен.
Кумшо вер верч «Советчане» ден «Турек» таҥасеныт да икымшыже 2:0 дене сеҥен. А финалыш кок Шернур команде — «Сокол» ден «Истоки» — лектыныт да шке капкашкышт иктыжат мечым пурташ йӧным пуэн огыл. Лач пенальти дене гына (2:1 счет) куснылшо кубокшым «Сокол» сеҥен налын. Эн сай вратарь Е.Пайдышев («Истоки»), эн сай нападающий Н.Сидоров («Советчане»), эн сай защитник Н.Казанцев («Сокол») лийыныт. Кубокым наҥгайыше командын кажне модшыжлан «Сырзавод» ЗАО (В.Кожанов) деч кок тӱжем теҥгеаш сертификатым кучыктымо. Организатор-влак тыгак МарГТУ-н ректоржо В.Шебашевлан кугу таум каласат.
Тыгай мероприятий землячестве-влакын еҥыштлан икте-весе дене лишкырак палыме лияш, кылым ышташ йӧным пуа.
С.Пехметова.
Авторын фотожо.
