У Торъялысе тӱвыра да каныме рӱдерыште тыгай лӱман фольклор да модыш программе районысо фестиваль эртен.
Тушко У Торъял, Какшанмучаш, Шура, Элембай, Овалже, Тошто Торъял, Кузнеч тӱвыра пӧрт-влакын фольклор да театральный коллективышт ушненыт. Мутлан, Шура гыч коллектив Покро пайрем, Какшанмучаш гыч «Кузьминки», Элембай гыч «Касьян кече», Кузнеч гыч «Шорыкйол кас», Овалже гыч «Кугече», Тошто Торъял гыч «Ялысе келшымаш», У Торъял гыч «Лесные забавы» ден «На Ивана Купала» — икманаш, тӱрлӧ пайрем йӱла гыч ужашым, фольклор композиций ден фольклор-модыш программе-влакым ончыктеныт.
7 гыч 17 ияш-влак коклаште I степенян диплом дене жюри «Овация» йоча театр студийым (У Торъялысе тӱвыра да каныме рӱдер) палемден. II степенян дипломым «Колядушки» фольклор коллективлан (Какшанмучаш СДК) кучыктен.
17 ияш да тылеч кугурак ийготан-влак коклаште жюри I степенян диплом дене Элембай СДК-н коллектившым палемден. II степенян дипломым «Келшымаш» (Кузнеч СДК), III степенян дипломым Шура СДК гыч фольклор коллектив-влаклан кучыктеныт.
Л.КАМАЛЕТДИНОВА
