Россий ФСБ-н Марий Элысе управленийжын пашаеҥже-влак республикыштына илыше ик пӧръеҥын тӱнямбал террористический организацийын Российыште чарыме радамышкыже ушнаш тӧчымыжым лугыч ыштеныт.
Юл кундем окружной военный судын тений 2 февральыште лукмо пунчалже дене Ф.Сафиным Россий Федерацийын Уголовный кодексшын 30-шо статьяжын 1-ше ужашыже, 205-ше статьян 2-шо ужашыж почеш преступленийым ыштымылан титаканлан шотленыт да пеҥгыде режиман колонийыш кум ийлан шындаш пунчалым луктыныт, палдара управленийын пресс-службыжо.
Параньга поселкысо рӱдӧ мечетьыште туныктышо да имамын полышкалышыже Сирийский Арабский Республике кумдыкышто улшо террористический организацийыш пураш шонен.
Тидым ышташ ямдылалтмыжым оперативно-кычалме мероприятий-влакым эртарен, документ-влак дене пеҥгыдемдыме. Россий ФСБ пашаеҥ-влак 2016 ий 14 ноябрьыште тудым Сирийыш каяш тӧчымыж годым Сочи оласе портышто кученыт.
Л.Камалетдинова.
