Кум кече почела, 23 гыч 25 июнь марте, Карелий всероссийский конкурсын финалистше-влакым вашлийын. Тушко Российын 7 регионжо: Коми, Башкортостан, Марий Эл, Карелий республикла, Тверь, Архангельск областьла да Краснодар кундем – гыч фольклор, куштышо да театр коллектив-влак чумыргеныт. Марий Эл Республик гыч тушко Россий калык усталыкын сулло коллективше, фольклор да этнографий сынан «Марий памаш» ансамбль миен.
— Ме кум фестивальыш ушненна. Икымше кечын Петрозаводскышто «В гостях у Калевалы» лӱман эпический культур фестивальышье шернур сӱаным куштен-муренна, эрвелмарий-влакын куштымашашт дене палдаренна. А кокымшо кечын Олонецкыште муро фестиваль лийын. Тушто Киров, Алабога да Советский район Кельмаксола вел мурым муренна, куштенна, — миен коштмышт нерген каласкала «Марий памаш» ансамбльым вуйлатыше, Марий Эл культурын сулло пашаеҥже Мария Соловьева. — А кумшо кечын Киндасово олаште мыскара сынан фестивальыште Кеҥеж Йӱштӧ кугыза, Кугыжан Йӱксӧ ӱдыр лийыныт. Пайремыште шуко оҥай вашлиймаш, мастер-класс-влак эртеныт.
«Марий памаш» ансамбль Карелий гыч пӧртылмекыже, вес кундемыш каяш ямдылалташ тӱҥалын. Ындыжым тудо Финляндийыште эртыше «Кихаус» фольклор фестивальыш ушна. Тиддеч посна ты коллектив Йоэнсу да Ряаккюля олалаште концерт программым ончыкта.
Алевтина Байкова.
(Фотом ансамбльын альбомжо гыч налме.)
